তেজপুৰ লোকসভা সমষ্টিৰ কংগ্ৰেছ দলৰ প্ৰাৰ্থী তথা অসম চৰকাৰৰ অৱসৰপ্ৰাপ্ত অতিৰিক্ত মুখ্য সচিব এম জি ভি কে ভানুৱে শেহতীয়াভাৱে সংঘটিত হোৱা পঞ্চায়ত আৰু গ্ৰামোন্নয়নৰ নিযুক্তি কেলেংকাৰিৰ চিবিআই তদন্তৰ দাবী জনাইছে।
তেজপুৰত কংগ্ৰেছ দলৰ পৰা এগৰাকী শক্তিশালী প্ৰাৰ্থীৰূপে নিৰ্বাচনত অৱতীৰ্ণ হোৱ ভানুৱে সোমবাৰে তেজপুৰত সংবাদ মাধ্যমৰ আগত বিস্ফোৰক অভিযোগ উত্থাপন কৰি সকলোৰে দৃষ্টি আকৰ্ষণ কৰিবলৈ সমৰ্থ হৈছে।
তেওঁ কয়,‘’ অসম চৰকাৰৰ পঞ্চায়ত আৰু গ্ৰামোন্নয়ন বিভাগত শেহতীয়াভাৱে যি নিযুক্তি প্ৰক্ৰিয়া সম্পন্ন হৈছে তাত চাকৰিবোৰ বিক্ৰী কৰিছে। এই সন্দৰ্ভত মই এই দুৰ্নীতিৰ বিৰুদ্ধে চি বি আই তদন্তৰ দাবী জনাইছো।’’
আসন্ন লোকসভা নিৰ্বাচনৰ বাবে আৰু মাত্ৰ কেইটামান দিন বাকী থকা অৱস্থাত ভানুৰ এই বিস্ফোৰণ ৰাজনৈতিকভাৱে গুৰুত্বপূৰ্ণ হিচাপে বিবেচিত হৈছে।
আনহাতে, অৱসৰপ্ৰাপ্ত অতিৰিক্ত মুখ্য সচিব এম জি ভি কে ভানুৱে পঞ্চায়ত আৰু গ্ৰামোন্নয়ন বিভাগৰ মন্ত্ৰী নৱ দলেক লাই ডিটেক্টৰৰ সন্মুখত পৰীক্ষা কৰোৱাৰো আহ্বান জনায়।
তেওঁ কয়, ‘’লাই ডিটেক্টৰৰ সন্মুখত মইয়ো সঁচা কথা কম আৰু মন্ত্ৰী গৰাকীয়ও সঁচা কথা ক’ব।‘’
ইপিনে, ভানুৱে মন্ত্ৰী পল্লৱ লোচন দাসৰ বিৰুদ্ধে চাহ শ্ৰমিকক প্ৰতাৰণা কৰাৰ অভিযোগ উত্থাপন কৰি কয় যে ৱেজ বৰ্ডে চাহ বাগানৰ শ্ৰমিকৰ মজুৰি ৩৫১ বৃদ্ধিত অনুমোদন দিছিল যদিও মন্ত্ৰী গৰাকীয়ে মালিক পক্ষৰ সৈতে গোপনে মিলি এই মজুৰি বৃদ্ধি কৰাৰ পৰা বিৰত আছে।