সদৌ অসম বাছ পৰিচালনা সমন্বয়ৰক্ষী সমিতিয়ে অহা ৮ আৰু ৯ এপ্ৰিলত চকা বন্ধ কাৰ্যসূচী ৰূপায়ন কৰিবলৈ সাজু হৈছে। সোমবাৰে তেজপুৰত সমিতিৰ যাত্ৰীবাহী পৰিবহণ ব্যৱসায়ীৰে অনুষ্ঠিত বৈঠকত এই সিদ্ধান্ত গ্ৰহণ কৰা হয়।
সদৌ অসম বাছ পৰিচালনা সমন্বয়ৰক্ষী সমিতিৰ আহ্বায়ক দাদুল নাথে বৈঠকৰ সিদ্ধান্তৰ কথা সদৰী কৰি কয় যে সদৌ অসম মটৰ পৰিবহণ সন্থাই বাৰম্বাৰ চলিত বছৰৰ মাৰ্চ মাহৰ ভিতৰত নিৰ্বাচন আৰু আইন-শৃংখলা জনিত কাৰণত ভাড়াৰ বাবে অধিগ্ৰহণ কৰিবলগা গাড়ীসমূহৰ ভাৰা ৫০ শতাংশ বৃদ্ধিৰ লগতে কৰ্মচাৰীৰ ভাত্তা ১০০ শতাংশ বৃদ্ধিৰ দাবী জনাই আহিছে যদিও চৰকাৰে এতিয়ালৈকে কোনো ইতিবাচক সঁহাৰি নিদিলে।
আনহাতে, তেওঁ কয় যে ২৪ ঘণ্টাৰ বাবে এজন চালকৰ আৰু এজন পৰিচালকৰ নিৰ্ধাৰিত ভাত্তা হ’ল ক্ৰমে ২৫০ টকা আৰু ২০০ টকা। এই ন্যূনতম ভাত্তাৰে কৰ্মচাৰীসকলে পুৱা চাহ-জলপানৰ পৰা আৰম্ভ কৰি ৰাতিৰ ভাতসাঁজলৈ সকলো মেনেজ কৰিবলগীয়া হয়।
ইপিনে, পঞ্চায়ত নিৰ্বাচনৰ সময়তো চৰকাৰে এই দাবীসমূহৰ প্ৰতি কোনো সঁহাৰি নজনালে।
সেয়েহে সোমবাৰৰ বৈঠকত সমন্বয়ৰক্ষী সমিতিয়ে এজন চালকৰ নিৰ্ধাৰিত ভাত্তা ২৫০ টকাৰ পৰা ৮০০ টকা আৰু এজন পৰিচালকৰ নিৰ্ধাৰিত ভাত্তা ২০০ টকাৰ পৰা ৬০০ টকা কৰিবলৈ আৰু ২৪ ঘণ্টাৰ বাবে নিৰ্ধাৰণ কৰা ভাৰা ২ হাজাৰ টকাৰ পৰা ৩ হাজাৰ টকালৈ বৃদ্ধি কৰাৰ দাবী জনায়।
সমিতিয়ে স্পষ্ট কৰি দিয়ে যে যদিহে চৰকাৰে ৫ এপ্ৰিলৰ ভিতৰত এই দাবীসমূহৰ প্ৰতি কোনোধৰণৰ সঁহাৰি নিদিয়ে, তেনেহ’লে ৮ আৰু ৯ এপ্ৰিলত চকা বন্ধৰ কাৰ্যসূচী গ্ৰহণ কৰিবলৈ বাধ্য হ’ব। তদুপৰি, বৈঠকত আসন্ন লোকসভা নিৰ্বাচনৰ বাবে বাছ অধিগ্ৰহণ কৰিবলৈ নিদিয়াৰো সিদ্ধান্ত গ্ৰহণ কৰা হয়।
চৰকাৰৰ পক্ষৰ পৰা এই সন্দৰ্ভত কোনো বুজাবুজি সম্ভৱ নহ’লে অহা ৮ আৰু ৯ এপ্ৰিলত ৰাজ্যজুৰি যাত্ৰীবাহী বাছ সেৱা অচল হৈ পৰিব।
