চামগুৰিৰ বৰমাবিলত মঙলবাৰে এক নৃসংশ হত্যাকাণ্ড সংঘটিত হয়। বৰমাবিলৰ ওৱাইদুল্লা নামৰ এজন লোকলৈ বিয়া হোৱা মঞ্জিলা খাতুন নামৰ এগৰাকী মহিলাৰ মৃতদেহ স্বামী গৃহৰ সমীপত উদ্ধাৰ হোৱাক কেন্দ্ৰ কৰি অঞ্চলটোত সৃষ্টি হৈছে তীব্ৰ চাঞ্চল্যৰ।
স্থানীয় একাংশ ৰাইজে সন্দেহ কৰা মতে দীৰ্ঘদিন ধৰি চলি অহা পাৰিবাৰিক কন্দলৰ ফলতে দুটিকৈ সন্তানৰ মাতৃ মঞ্জিলা খাটুনক তেওঁৰ স্বামী ওৱাইদুল্লাই অকথ্য নিৰ্যাতন চলাই হত্যা কৰিছে।
মৃতদেহটোত থকা আঘাতৰ চিনলৈ চাই তথা মহিলা গৰাকীৰ মৃত্যুৰ পিছত মুখত বিহ ঢালি নিজ স্বামীয়ে আত্মহত্যাৰ ৰূপ দিয়াৰ অপচেষ্টা চলাইছিল বুলিও অভিযোগ উত্থাপন কৰিছে স্থানীয় ৰাইজৰ লগতে মহিলাগৰাকীৰ পৰিয়ালৰ লোকে।
আনহাতে ঘটনা সংঘটিত হোৱাৰ পিছৰে পৰা ওৱাইদুল্লাৰ লগতে স্বামী পৰিয়লৰ আটাইকেইজন সদস্য পলাতক অৱস্থাত আছে।
ঘটনাৰ খবৰ লাভ কৰি মোৱামাৰি আৰক্ষী ঘটনাস্থলীত উপস্থিত হৈ মহিলাগৰাকীৰ মৃতদেহ উদ্ধাৰ কৰি মৰনোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰাৰ লগতে ঘটনাৰ প্ৰাৰম্ভিক অনুসন্ধান আৰম্ভ কৰিছে।
