নাগৰিকত্ব সংশোধনী বিধেয়কৰ জৰিয়তে হিন্দু বাংলাদেশীক সংস্থাপনৰ বিৰোধিতা কৰি অসমৰ বিভিন্ন জাতীয় দল-সংগঠনে তীব্ৰ আন্দোলন গঢ়ি তোলাৰ পাছত বিজেপিয়ে বিষয়টো অস্বীকাৰ কৰি আহিছে। তদুপৰি, বিধেয়কখনৰ জৰিয়তে কেৱল শৰণাৰ্থীসকলকহে নাগৰিকত্ব দিয়া হ’ব বুলি উল্লেখ কৰি তেওঁলোকে এই সংখ্যা বহু কম হ’ব বুলিও দাবী কৰি আহিছে।
বিজেপিৰ এনে দাবীৰ বিপৰীতে অসমৰ জাতীয় দল-সংগঠনে প্ৰকাশ কৰি অহা আশংকাক সত্য প্ৰমানিত কৰি বিশ্ব হিন্দু পৰিষদৰ অধীনৰ বাংলাদেশ নেশ্যনেল হিন্দু গ্ৰেণ্ড এলায়েন্সৰ সম্পাদক প্ৰধান গোবিন্দ চন্দ্ৰ প্ৰামানিকে বিধেয়কখনৰ প্ৰকৃত দিশটো ফাদিল কৰিছে।
প্ৰামানিকে দাবী কৰে যে বিতৰ্কিত নাগৰিকত্ব সংশোধনী বিধেয়কখন গৃহীত হ’লে প্ৰায় ২কোটি ৫০ লাখ বাংলাদেশী ভাৰতলৈ অহাৰ বাবে সাজু হৈ আছে। তেওঁ লগতে দাবী কৰে যে সেয়া হ’লে অসম তথা উত্তৰ-পূৰ্বাঞ্চলৰ জনগাঁথনি সম্পূৰ্ণ সলনি হৈ পৰিব। আজি এখন শীৰ্ষ স্থানীয় দৈনিক কাকতত এই বাতৰি প্ৰকাশ পাইছে।
হিন্দু ধৰ্মীয় নেতাগৰাকীৰ স্পষ্ট অভিযোগ যে বিজেপি নেতৃত্বাধীন ভাৰতৰ চৰকাৰখনে হিন্দু বাংলাদেশীসকলক ভাৰতলৈ অহাৰ বাবে প্ৰৰোচিত কৰিছে।
আনহাতে, ধৰ্মীয় নিৰ্যাতন সন্দৰ্ভত প্ৰামানিকে কয় যে বিজেপি চৰকাৰে বাংলাদেশ চৰকাৰক সংখ্যালঘুৰ ওপৰত নিৰ্যাতন বন্ধ কৰাৰ বাবে এটা কঠোৰ সকীয়নি দিয়া উচিত।
তেওঁ লগতে কয় যে সংখ্যালঘুৰ প্ৰতি বাংলাদেশ চৰকাৰ অতি সহানুভুতিশীল আৰু বিজেপিয়ে যদি এইক্ষেত্ৰত পদক্ষেপ গ্ৰহণ কৰে তেনেহ’লে ই আৰু অধিক ফলপ্ৰসু হৈ উঠিব। প্ৰামানিকে লগতে হিন্দু শৰণাৰ্থীসকলক বাংলাদেশ চৰকাৰে যাতে ঘুৰাই লয় তাৰ বাবে ভাৰতে হেঁচা দিব লাগে বুলিও মত পোষণ কৰে।
ইপিনে,বিজেপিৰ অভিভাৱক সংগঠন বিশ্ব হিন্দু পৰিষদৰ বাংলাদেশ শাখাৰ দায়িত্বত থকা গোবিন্দ চন্দ্ৰ প্ৰামানিকে এন আৰ চিত নাম নথকা লোকসকলক বাংলাদেশলৈ পঠিয়াই দিব লাগে বুলিও মন্তব্য কৰিছে।
বিজেপিয়ে বিচৰাধৰণে যদি আগবাঢ়ে তেতিয়াহ’লে চুবুৰীয়া ৰাষ্ট্খন এখন মৌলবাদী ৰাষ্ট্ৰত পৰিণত হ’ব বুলিও তাৎপৰ্যপূৰ্ণ মন্তব্য আগবঢ়ায় নেতাগৰাকীয়ে। সি যি কি নহওঁক, বিশ্ব হিন্দু পৰিষদৰ নেতাগৰাকীৰ বক্তব্যই নাগৰিকত্ব সংশোধনী বিধেয়কখনে অসম তথা উত্তৰ-পূৰ্বাঞ্চলৰ জনসাধাৰণৰ বাবে কঢ়িয়াই আনিব পৰা অশনি সংকেতৰ কথাকে উদঙাই দিছে।
