নগাঁৱৰ গোমোঠা গাঁও আৰু নৰ্টম গাঁৱৰ মাজত ৩৭নং ৰাষ্ট্ৰীয় ঘাইপথত আজি পুৱতি নিশা এখন তেল পৰিবাহী টেংকাৰ দুৰ্ঘটনাগ্ৰস্ত হোৱাত সমগ্ৰ অঞ্চল জুৰি সৃষ্টি হৈছে তীব্ৰ আতংকৰ।
আনুমানিক ২০ হাজাৰ লিটাৰ ডিজেল আৰু পেট্ৰ’ল কঢ়িয়াই অনা AS-01JC-4672 নম্বৰৰ টেংকাৰখনে নুমলীগড়ৰ পৰা মাইবঙৰ দিশে গৈ থকা অৱস্থাতে বিপৰীত দিশৰ পৰা অহা এখন বাহনৰ অনিয়ন্ত্ৰিত গতি-বিধিৰ বাবেই সংঘটিত হয় দুৰ্ঘটনাটো।
অৱশ্যে কিছু সময়ৰ পাছত ঘটনাস্থলত যান-বাহন আৰক্ষীৰ লগতে অগ্নিনিৰ্বাপক বাহিনী উপস্থিত হৈ পৰিস্থিতি কিছু নিয়ন্ত্ৰণত আনিবলৈ চেষ্টা কৰে যদিও একাংশ লোকে আৰক্ষীৰ বাধাকো নেওচি দুৰ্ঘটনাগ্ৰস্ত বাহনখনৰ পৰা তেল নিবলৈ হেতা-ওপৰা লগোৱা পৰিলক্ষিত হয়।
দুৰ্ঘটনাগ্ৰস্ত তেল পৰিবাহী টেংকাৰখনৰ পৰা পথৰ দাঁতিত অবিৰত ভাৱে নিগৰি থকা তেলৰ পৰা অতি ভয়ংকৰ দুৰ্ঘটনা হোৱাৰ শংকাত এতিয়া সময় পাৰ কৰিছে স্থানীয় ৰাইজে।
