ৰঙালী বিহুৰ প্ৰাকক্ষণত কামৰূপ জিলাৰ ৰঙিয়াত শুকুৰবাৰে এক শোকাৱহ পথ দুৰ্ঘটনা সংঘটিত হয়। দুৰ্ঘটনাটোত নাজিৰ আলী নামৰ এজন যুৱক থিতাতে নিহত হোৱাৰ লগতে হাছান আলী নামৰ আন এজন যুৱক গুৰুতৰভাবে আহত হয়।
ঘটনাৰ বিৱৰণী অনুসৰি, শুকুৰবাৰে নজিৰ আলী আৰু হাছান আলী নামৰ যুৱক দুজনে নিজৰ দুচকীয়া বাহনেৰে ব্যক্তিগত কামত ঘৰৰ পৰা ৰঙিয়া অভিমুখে আহি আছিল। ৰঙিয়াৰ সমীপৱৰ্তী উদিয়ানা চ’ক পাওঁতে একে দিশৰ পৰাই আহি থকা এখন দ্ৰুতবেগী ট্ৰাকে বাইকখনত তীব্ৰ জোৰেৰে খুণ্ডা মাৰে। আকস্মিক দুৰ্ঘটনাতটোত নজিৰ আলী নামৰ যুৱকজনৰ থিতাতে মৃত্যু হয় আৰু হাছান আলী ৰক্ষা পৰে যদিও গুৰুতৰ ভাবে আহত হয়।
ঘটনাস্থলীত উপস্থিত ৰাইজৰ সহযোগত আহত হাছান আলীক উন্নত চিকিৎসাৰ বাবে চিকিৎসালয়লৈ প্ৰেৰণ কৰা হয়। দুৰ্ঘটনা সংঘটিত কৰিয়ে ট্ৰাকসহ চালক জনে পলায়ন কৰে।
আনহাতে, দুৰ্ঘটনাটোৰ পাছত ক্ষুব্ধ একাংশ ৰাইজে ৰাষ্ট্ৰীয় ঘাইপথ অৱৰোধ কৰি তীৰ্ব প্ৰতিবাদ সাব্যস্ত কৰে। ৰাইজৰ প্ৰতিবাদৰ ফলত ৩১ নং ৰাষ্ট্ৰীয় ঘাইপথত কিছুসময়ৰ বাবে বহু সংখ্যক যান-বাহন আবদ্ধ হৈ পৰে। পৰৱৰ্তী সময়ত প্ৰশাসনৰ তৰফৰ পৰা পৰিস্থিতি নিয়ন্ত্ৰণ কৰা হয়।
উল্লেখযোগ্য যে, ৩১ নং ৰাষ্ট্ৰীয় ঘাইপথৰ ৰঙিয়াৰ পৰা চাংচাৰিলৈ পথছোৱা দুৰ্ঘটনা প্ৰৱণ অঞ্চল হিচাপে পৰিগণিত হৈছে।বিগত সময়তো কমলপুৰ, চাংচাৰি, ৰঙিয়া আদি অঞ্চলত ভালেকেইটা পথ দুৰ্ঘটনা সংঘটিত হৈছে। মূলত দ্ৰুতবেগী আল্ট্ৰা বাছ আৰু ট্ৰাকসমূহৰ দৌৰাত্মৰ বাবেই এনে দুৰ্ঘটনাৰ সংখ্যা বৃদ্ধি পাইছে।
