শুনিবলৈ আচহুৱা লাগিলেও কথাটো সত্য। চেন্ট্ৰেল ব’ৰ্ড অফ ফিল্ম চাৰ্টিফিকেশ্যন (চিবিএফচি)ৰ দৃষ্টিত অসমীয়া চলচ্চিত্ৰ ‘অভিযুক্ত’ হৈছে !
হয়, আপুনি ঠিকেই শুনিছে। কিন্তু প্ৰশ্নটো হ’ল সেয়া কেনেকৈ আৰু কিয় হ’বলৈ পালে?
চিত্ৰগৃহত দৰ্শকৰ প্ৰদৰ্শনৰ বাবে মুক্তি দিয়াৰ আগতে এথন চলচ্চিত্ৰই চিবিএফচিৰ পৰা প্ৰমাণ পত্ৰ লোৱাটো বাধ্যতামূলক।
চেন্ট্ৰেল ব’ৰ্ড অফ ফিল্ম চাৰ্টিফিকেশ্যন হৈছে ভাৰত চৰকাৰৰ তথ্য আৰু সম্প্ৰচাৰ বিভাগৰ অধীনৰ চেন্সৰশ্বিপ তথা বৰ্গীকৰণৰ এটি স্বতন্ত্ৰ সংস্থা। দেশৰ চলচ্চিত্ৰ নিৰ্মাণ কৰা সকলো ৰাজ্যতে চিবিএফচিৰ একোখন ৰাজ্যিক ব’ৰ্ড আছে। এই উদ্দেশ্যেৰ অসমতো এখন ৰাজ্যিক ব’ৰ্ড আছে।
দেশৰ চৰকাৰী আইন অনুসৰি প্ৰস্তুত কৰা এটা মানসম্পন্ন পদ্ধতিৰ এই গোটেই প্ৰক্ৰিয়াটোত কোনো ভুল নাই।
কিন্তু এইখিনিতে গোটেই বেমেজালিটো আৰম্ভ হৈছে। প্ৰমান পত্ৰত ভাষাটো আচামীজ (অসমীয়া)ৰ পৰিৱৰ্তে কোৱা হৈছে ‘আচামী’ বুলি। আচামীজ হৈছে ভাৰতীয় সংবিধানত উল্লেখ থকা অসম ৰাজ্যৰ বাবে আনুষ্ঠানিকভাৱে স্বীকৃত ভাষা।
চেন্সৰ ব’ৰ্ড ইয়াৰ বিষয়ে অজ্ঞ নে উত্তৰ পূৰ্বাঞ্চলৰ নেতৃস্থানীয় হিচাপে পৰিচিত অসমীয়া জনসাধাৰণৰ আৱেগক আঘাত কৰাৰ এক ইচ্ছাকৃত প্ৰয়াস।
কিয়নো ‘আচামী’ মানে অসমীয়া বা বাংলাত ‘অভিযুক্ত’। কাৰণ যিয়েই নহওক লাগিলে এইটোৱে ফিল্ম চাৰ্টিফিকেশ্যন বৰ্ডৰ কাণ্ডজ্ঞানহীনতাকে সূচাইছে। এখন চলচ্চিত্ৰক প্ৰমান পত্ৰ দিয়া সংস্থাটোৰ বিশেষ অঞ্চলটোৰ ৰীতি-নীতি, ইতিহাস, সংস্কৃতি, পৰম্পৰা আৰু ভাষাৰ সম্যক জ্ঞান থকাটো বাঞ্চনীয়।
বিশিষ্ট চলচ্চিত্ৰ সমালোচক তথা চলচ্চিত্ৰ নিৰ্মাতা উৎপল বৰপুজাৰীয়ে এই কথাটো উত্থাপন কৰিছে আৰু বিষয়টোৱে সামাজিক গণমাধ্যমত এক ব্যাপক প্ৰতিক্ৰিয়াৰ সৃষ্টি কৰিছে।
উৎপল বৰপুজাৰী এগৰাকী ৰাষ্ট্ৰীয় বঁটা প্ৰাপ্ত চলচ্চিত্ৰ সমালোচক যাৰ প্ৰথমখন চলচ্চিত্ৰ ‘ইশু’ৱে শেহতীয়াভাৱে দেশে-বিদেশে সমাদৰ লাব কৰিছে। ইয়াৰ আগতে বিগত কেইবছৰত তেওঁ কেইবাখনো চিন্তা উদ্ৰেক কাৰী তথ্য চিত্ৰ নিৰ্মাণ কৰিছে।
চলচ্চিত্ৰ নিৰ্মাতাগৰাকীয়ে অলপতে চিবিএফচিৰ অধ্যক্ষ হিচাপে নিযুক্ত প্ৰসূন যোশীৰ পৰা প্ৰত্যক্ষভাৱে উত্তৰ বিচাৰিছে আৰু তথ্য আৰু সম্প্ৰচাৰ মন্ত্ৰালয় তথা মন্ত্ৰী স্মৃতি ইৰাণীকো বিষয়টো সম্পৰ্কত অৱগত কৰিছে।
বৰপুজাৰীৰ এনে তৎপৰতাৰ পিছতে বিষয়টো সম্পৰ্কত বহু ব্যক্তিয়ে তীব্ৰ প্ৰতিক্ৰিয়া ব্যক্ত কৰিছে। এইসকলৰ ভিতৰত আছে গুৱাহাটী উচ্চ ন্যায়ালয়ৰ জ্যেষ্ঠ অধিবক্তা নিলয় দত্ত। এনে অলেখ প্ৰতিক্ৰিয়া এতিয়াও অব্যাহত আছে।
সিদ্ধান্ত গ্ৰহণৰ ভাৰ আমি পাঠকসকলৰ হাততে এৰিলো।
