প্ৰথম পৰ্যায়ৰ ভোটগ্ৰহণ সমাপ্ত হোৱাৰ পাছত এতিয়া দ্বিতীয় আৰু তৃতীয় পৰ্যায়ৰ নিৰ্বাচনৰ বাবে ৰাজ্যৰ ৰাজনৈতিক দলসমূহৰ মাজত ব্যাপক তৎপৰতা পৰিলক্ষিত হৈছে। বিজেপিৰ ষ্টাৰ কেম্পেইনাৰ হিচাপে ইতিমধ্যে প্ৰধান মন্ত্ৰী নৰেন্দ্ৰ মোডী আৰু অমিত শ্বাহে প্ৰচাৰ চলোৱাৰ পাছত এইবাৰ কংগ্ৰেছৰ প্ৰচাৰ চলাবলৈ অসমলৈ আহিব প্ৰিয়ংকা গান্ধী।
কাইলৈ অৰ্থাৎ ১৪ এপ্ৰিলত বিহুৰ দিনাখনেই অসমলৈ আহিব কংগ্ৰেছৰ সাধাৰণ সম্পাদিকা প্ৰিয়ংকা গান্ধী। প্ৰিয়ংকা গান্ধীৰ আগমণক লৈ প্ৰদেশ কংগ্ৰেছৰ নেতা-কৰ্মীসকল বিশেষভাৱে উৎসাহিত হৈ পৰিছে।
কাৰ্যসূচী অনুসৰি, কাইলৈ শিলচৰত প্ৰিয়ংকা গান্ধীয়ে এক ৰোড শ্ব’ত অংশ ল’ব। শিলচৰৰ কংগ্ৰেছ প্ৰাৰ্থী সুস্মিতা দেৱৰ হৈ নিৰ্বাচনী প্ৰচাৰ চলাবলগীয়া প্ৰিয়ংকা গান্ধীৰ কাৰ্যসূচীক লৈ বিৰোধী দলটোৰ নেতা-কৰ্মীসকলৰ মাজত যুদ্ধকালীন তৎপৰতা চলিছে।
প্ৰদেশ কংগ্ৰেছৰ এক সূত্ৰই জানিবলৈ দিয়া মতে, কাইলৈ পুৱা দহ বজাত শিলচৰৰ ৰংপুৰৰ পৰা পদযাত্ৰা আৰম্ভ কৰিব প্ৰিয়ংকা গান্ধীয়ে। ৰাংগিৰখাড়িত এই পদযাত্ৰাৰ সামৰণি পৰিব। আনহাতে, কংগ্ৰেছৰ ষ্টাৰ কেম্পেইনাৰগৰাকীৰ ৰোড শ্ব’ত কেইবা সহস্ৰাধিক লোকৰ সমাগম হোৱাৰ আশা ব্যক্ত কৰে সূত্ৰটোৱে।
নিখিল ভাৰত মহিলা কংগ্ৰেছৰ সভানেত্ৰী তথা শিলচৰৰ সাংসদ সুষ্মিতা দেৱৰ হৈ প্ৰচাৰ চলাবলগীয়া কংগ্ৰেছৰ ষ্টাৰ কেম্পেইনাৰ প্ৰিয়ংকা গান্ধীৰ আগমনে দলটোৰ কৰ্মী-সমৰ্থকসকলক বিশেষভাৱে অনুপ্ৰাণিত কৰাৰ সম্ভাৱনা আছে।
