বিহুৰ বতৰতো নিৰ্বাচনী প্ৰচাৰ অব্যাহত ৰখা মুখ্য মন্ত্ৰী সৰ্বানন্দ সোণোৱালৰ আজিৰ এখন সভা বাতিল কৰিব লগীয়া হয় প্ৰকৃতিৰ ৰোষৰ বাবে। হাইলাকান্দিৰ কাটলিচেৰা বিধানসভাৰ সমষ্টিৰ অন্তৰ্গত বৰ্নাপুৰ চাহ বাগিচাত অনুষ্ঠিত হ’ব লগীয়া সভাখনত সোণোৱাল ১০ বজাত উপস্থিত হোৱাৰ আছিল।
কি্ন্তু সভাৰ প্ৰাক মুহূৰ্তত অহা এজাক ধুমুহাই সভাৰ বাবে নিৰ্মাণ কৰা মণ্ডপকে ধৰি সমস্তবোৰ তচনচ কৰি পেলায়।
প্ৰকৃতিৰ ৰোষৰ পিছত সভাৰ স্থান পৰিদৰ্শন কৰি বিজেপিৰ স্থানীয় আয়োজকসকলে মুখ্য মন্ত্ৰীৰ কাৰ্য্যসূচীৰ দায়িত্বত থকা বিষয়ববীয়াৰ সৈতে আলোচনা কৰে আৰু সভাখন বাতিল কৰে।
শিলচৰত ধুমুহাই উৰুৱাই নিলে আৰক্ষীৰ অস্থায়ী শিবিৰ
ইপিনে শিলচৰতো আজি পুৱাই অহা এজাক বিধ্বংসী ধুমুহাৰ ফলত আৰক্ষীৰ এটা অস্থায়ী শিবিৰ ভাগি পৰে। পেৰেড গ্ৰাউণ্ডত স্থাপন কৰা অস্থায়ী শিবিৰটোৰ ভিতৰত সেই সময়ত থকা কেইবাজনো জোৱানৰ প্ৰাণ কথমপি ৰক্ষা পৰে।
জানিব পৰামতে, নিৰ্বাচনত নিয়োজিত আৰক্ষী জোৱানসকলক এই শিবিৰত ৰখা হৈছিল। কিন্তু নিম্নমানৰ সামগ্ৰীৰে নিৰ্মাণ কৰা বুলি অভিযোগ উঠা শিবিৰটো আজি ভাগি পৰাত ক্ষুভিত হৈছে জোৱানসকল। ঘটনাটোত তেওঁলোকৰ বহুতো সা-সমগ্ৰী নষ্ট হয়।
