ৰাজ্যত ৰঙালী বিহুৰ আনন্দৰ মাজতে গুৱাহাটী মহানগৰীৰ খাৰঘূলিৰ ব্ৰহ্মপুত্ৰৰ পানী যুঁৱলিত আজি এগৰাকী কিশোৰীৰ মৃতদেহ উদ্ধাৰ হোৱা ঘটনাক কেন্দ্ৰ কৰি অঞ্চলটোত তীব্ৰ চাঞ্চল্য সৃষ্টি হয়।
মৃতদেহটো লুইতৰ পানীত ওপঙি থকা অৱস্থাত এজন মাছমৰীয়াই প্ৰত্যক্ষ কৰে। কিশোৰীগৰাকীৰ মৃতদেহটো দেখি লগে লগে স্থানীয় ৰাইজে খবৰ দিয়ে লতাশিল আৰক্ষীক।
আৰক্ষী ঘটনাস্থলত উপস্থিত হৈ মৃতদেহটো উদ্ধাৰ কৰে আৰু প্ৰাথমিক তদন্তত মৃত কিশোৰীগৰাকীৰ ঘৰ খাৰঘূলিৰ জয়পুৰত বুলি আৰক্ষীয়ে প্ৰকাশ কৰে।
মনকৰিব লগীয়া যে মৃতদেহটো উদ্ধাৰৰ সময়ত মৃতদেহৰ মুখমণ্ডলত স্পষ্ট ৰূপত আঘাতৰ চিন দেখা পোৱা গৈছে। গতিকে আৰক্ষীয়ে ইয়াক ধৰ্ষণ আৰু হত্যাকাণ্ড বুলি সন্দেহ কৰিছে। যাৰ পৰিপ্ৰেক্ষিতত আৰক্ষীয়ে স্নিফাৰ ডগৰ সহায়ত সমগ্ৰ অঞ্চলটোতে তীব্ৰ ৰূপত অভিযান চলোৱা পৰিলক্ষিত হয়।
আৰক্ষীয়ে তদন্ত চলাই আছে যদিও মৰণোত্তৰ পৰীক্ষাৰ অন্ততহে ঘটনাৰ প্ৰকৃত ৰহস্য পোহৰলৈ আহিব বুলি সাংবাদিকৰ আগত প্ৰকাশ কৰে সহকাৰী আৰক্ষী আয়ুক্ত পাহাৰী দুৱৰিয়ে। বৰ্তমান মৃতদেহটো মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ প্ৰেৰণ কৰা হৈছে।
উল্লেখ্য যে, যোৱা ১৫ এপ্ৰিলৰ বিয়লি ২ বজাৰ পৰা নিৰুদ্দেশ হৈ আছিল কিশোৰী গৰাকী। উক্ত দিনাই লতাশিল আৰক্ষী থানাত কিশোৰীগৰাকী নিৰুদ্দেশ হোৱা বুলি মাতৃ অনিমা বড়োৱে এজাহাৰ দাখিল কৰিছিল। আৰক্ষীয়ে ভাৰতীয় দণ্ডবিধিৰ ৩৬৩ ধাৰাৰ অধীনত ১১৫/১৯ নম্বৰত এক গোচৰ ৰুজু কৰিছিল।
ইফালে ঘটনা সন্দৰ্ভত কিশোৰীগৰাকীৰ মোমায়েক নিকেন বড়োৱে নৰ্থ-ইষ্ট নাওক জনোৱা মতে উক্ত দিনা দুপৰীয়া প্ৰায় ১ মান বজাত কিশোৰী গৰাকীয়ে সম্বন্ধীয় তিনিজন সৰু ল’ৰাৰ সৈতে তেওঁৰ দোকানৰ পৰা ২০ টকা লৈ কলড্ৰিংছ খাইছিল। তাৰ ঠিক এঘন্টামান পাছৰ পৰাই কিশোৰী গৰাকী নোহোৱা হয়।
