কলিয়াবৰৰ বাণিজ্যিক কেন্দ্ৰ জখলাবন্ধাত ৩৭নং ৰাষ্ট্ৰীয় ঘাইপথৰ দুয়োপাৰে সৰু-সুৰা বিভিন্ন “অবৈধ” ব্যৱসায়িক প্ৰতিষ্ঠানত দেওবাৰে উচ্ছেদ চলায় মহকুমা প্ৰশাসনে।
পুৱাৰে পৰা দিনজুৰি চলোৱা অভিযানটোত কেইবাটাও অবৈধ পাৰ্কিং উচ্ছেদ কৰাৰ লগতে মেজিককে ধৰি প্ৰায় ৩০খন সৰু-মজলীয়া নথিপত্ৰহীন বাহনো আৰক্ষীয়ে জব্দ কৰে।
জব্দ গাড়ীসমূহ বৰ্তমান জখলবন্ধা থানাত ৰখা হৈছে।
প্ৰশাসনে দাবী কৰা মতে ৰাষ্ট্ৰীয় ঘাইপথটোৰ দুয়োপাৰে অবৈধ পাৰ্কিঙৰ ফলত অঞ্চলটোত যানজঁটৰ সৃষ্টি হোৱাৰ লগতে দুৰ্ঘটনাৰ প্ৰকোপ বৃদ্ধি পাইছিল। আনহাতে পদপথৰ দোকানসমূহে যাতায়াতত অসুবিধাৰ সৃষ্টি কৰিছিল, প্ৰশাসনৰ দাবী।
মহকুমা কাৰ্য্যবাহী দণ্ডাধীশদ্বয় অমৰজ্যোতি নাথ আৰু বাৰ্বি হাজৰিকাৰ নেতৃত্বত চলা অভিযানটোত জখলাবন্ধা আৰক্ষী চাউনিৰ ভাৰপ্ৰাপ্ত বিষয়াই সহযোগ কৰিছিল।
