২৩ এপ্ৰিল অৰ্থাৎ মঙলবাৰে ৰাজ্যৰ বিভিন্ন প্ৰান্তৰ লগতে গোলাঘাট শাখা সাহিত্য সভাইও বিশ্ব গ্ৰন্থ দিৱস উদযাপন কৰে। উক্ত দিৱস উপলক্ষে বিয়লি ৩ বজাৰ পৰা পণ্ডিত হেমচন্দ্ৰ গোস্বামী ভৱনৰ প্ৰেক্ষাগৃহত এক সভা আয়োজন কৰা হয়।
শাখা সাহিত্য সভাৰ সভাপতি অপৰাজিতা বৰুৱাৰ সভাপতিত্বত অনুষ্ঠিত সভাৰ উদ্দেশ্য ব্যাখ্যা কৰে সম্পাদক সুনীল কুমাৰ ৰাজগুৰুৱে। সভাত নিৰ্দিষ্ট বক্তা হিচাবে অংশগ্ৰহণ কৰি জয়া গগৈ মহাবিদ্যালয়ৰ গ্ৰন্থগাৰিক দীপা বৰুৱাই গ্ৰন্থ চৰ্চাৰ সমান্তৰালভাৱে গ্ৰন্থগাৰৰ প্ৰয়োজনীয়তাৰ বিষয়ে উল্লেখ কৰে।
তেওঁ আজি প্ৰযুক্তিৰ দ্ৰুত বিকাশৰ যুগত ইণ্টাৰনেটে গ্ৰন্থ অধ্যয়ন সহজলভ্য কৰি তুলিছে যদিও গ্ৰন্থ অধ্যয়নৰ সুস্থ পৰিৱেশ আৰু প্ৰকৃত মাদকতা ৰাজহুৱা গ্ৰন্থগাৰতহে লাভ কৰিব পাৰি বুলি উল্লেখ কৰে।
সভাত শাখা সাহিত্য সভাৰ প্ৰাক্তন সভাপতি, প্ৰবীণ গ্ৰন্থ প্ৰকাশক ক্ষীৰোদ কুমাৰ গোস্বামী, বিশিষ্ট লেখক চিকিৎসক অজিত বৰুৱাই বিশ্ব গ্ৰন্থ দিৱসৰ তাৎপৰ্য সম্পৰ্কত বক্তব্য প্ৰদান কৰে।
আনহাতে উক্ত সভাতে গোলাঘাট চিনাতলী অঞ্চলৰ সাংস্কৃতিক কৰ্মী দেৱযানী দত্তৰ নাট্য সংকলন ‘শুক্লপক্ষৰ জোনাক’ উন্মোচন কৰা হয়। গ্ৰন্থখন উন্মোচন কৰে বিশিষ্ট চলচিত্ৰ পৰিচালক দীনেশ গগৈয়ে। লগতে শাখা সাহিত্য সভাৰ প্ৰাচীৰ পত্ৰিকা “কাঁচলি” উন্মোচন কৰে ডাঃ অজিত বৰুৱাই। সভাত বহুসংখ্যক সাহিত্যনুৰাগী লোক উপস্থিত থাকে।
