গুৱাহাটী উচ্চ ন্যায়ালয়ে শুকুৰবাৰে নগাঁও জিলাৰ উপ আৰক্ষী অধীক্ষক সবিতা দাসৰ নিলম্বন প্ৰত্যাহাৰ কৰাৰ লগতে তেওঁৰ পদবীত মৰ্যাদাসহকাৰে মকৰল কৰাৰ নিৰ্দেশ দিয়ে। বিষয়াগৰাকীৰ বিৰুদ্ধে উত্থাপিত উৎকোচ গ্ৰহণৰ অভিযোগ সম্পৰ্কত অসম চৰকাৰে নিৰ্দিষ্ট তিনিমাহ সময়ৰ ভিতৰত অভিযোগনামা দাখিল কৰিব নোৱাৰাৰ বাবেই আদালতে এই নিৰ্দেশ দিয়ে।
উল্লেখযোগ্য যে আৰক্ষী বিষয়াগৰাকীক যোৱা ২০১৮ চনৰ ১৭ ছেপ্টেম্বৰত অতিৰিক্ত আৰক্ষী সঞ্চালক প্ৰধান(প্ৰশাসন)ৰ দ্বাৰা বিভাগীয় তদন্তৰ পাছত নিসম্বন কৰা হৈছিল। উক্ত তদন্তৰ প্ৰতিবেদন সেই বৰ্ষৰে ৭ ছেপ্টেম্বৰত দাখিল কৰা হৈছিল।
জানিব পৰা মতে, নিলম্বিত আৰক্ষী বিষয়া দাসে যোৱা বৰ্ষৰ ১০ অক্টোবৰত তেওঁৰ বিৰুদ্ধে উত্থাপিত উৎকোচ গ্ৰহণৰ অভিযোগ সন্দৰ্ভত এখন লেখ আবেদন দাখিল কৰিছিল। আবেদনখনত তেওঁ বিভাগীয় প্ৰতিপক্ষৰ ষড়যন্ত্ৰৰ বলি হোৱা বুলি দাবী কৰিছিল। তদুপৰি, তেওঁ একাংশ আৰক্ষী বিষয়াৰ অপৰাধীৰ সৈতে সম্পৰ্ককলৈয়ো প্ৰশ্ন উত্থাপন কৰিছিল।
উল্লেখ্য যে নগাঁৱৰ এইগৰাকী উপ আৰক্ষী অধীক্ষক(সদৰ) সবিতা দাসে যোৱা ৩১ আগষ্টৰ নিশা নগাঁও চহৰৰ পলিৰোডৰ নিজ ঘৰৰ সন্মুখৰ পৰা সৌৰভ হাজৰিকা নামৰ যুৱকজনৰ লগতে আন তিনিজন যুৱকক বিনা কাৰণত আটক কৰি সদৰ থানালৈ লৈ অনা বুলি অভিযোগ উঠিছিল।
উপ আৰক্ষী অধীক্ষকগৰাকীয়ে ঘটনা সন্দৰ্ভত সৌৰভ হাজৰিকাৰ লগতে যুৱককেইজনক পিছদিনা বিয়লি চাৰি বজা পৰ্যন্ত আবদ্ধ কৰি ৰখাৰ অভিযোগ উত্থাপন কৰি সৌৰভ হাজৰিকাই তেওঁৰ চালকৰ অনুজ্ঞাপত্ৰ আৰু পঞ্জীয়ন পত্ৰ দুখন বিষয়াগৰাকীয়ে নিজৰ জিম্মাত ৰখাৰো অভিযোগ আনিছিল।
আনহাতে, হাজৰিকাই অভিযোগ কৰিছিল যে নগাঁও আৰক্ষী বিভাগৰ জ্যোতি খাউণ্ড নামৰ এজন কৰ্মচাৰীয়ে অনুজ্ঞাপত্ৰ আৰু পঞ্জীয়ন পত্ৰ দুখন ওভতাই দিয়াৰ বিনিময়ত উপ আৰক্ষী অধীক্ষকগৰাকীৰ দোহাই দি ৪০ হাজাৰ টকা দাবী কৰিছিল।
কিন্তু সৌৰভ হাজৰিকাই উক্ত ধন দাবী কাণ্ড কেমেৰাৰ জৰিয়তে বন্দী কৰিছিল আৰু ইয়াৰ পাছতে জ্যেষ্ঠ আৰক্ষী বিষয়াৰ ধন দাবীৰ প্ৰসংগত আৰক্ষী সঞ্চালক প্ৰধানলৈ অভিযোগ প্ৰেৰণ কৰি হাজৰিকাই ধন দাবীৰ ঘটনাৰ সুবিচাৰ দাবী কৰিছিল।
ইয়াৰ পিছতে এই সম্পৰ্কীয় অভিযোগ প্ৰসংগত এটা অপৰাধজনিত গোচৰ ৰুজু কৰিবলৈ নগাঁও আৰক্ষীলৈ নিৰ্দেশ দিছিল অসম আৰক্ষীৰ সঞ্চালক প্ৰধান কুলধৰ শইকীয়াই। নগাঁও আৰক্ষী অধীক্ষক শংকৰব্ৰত ৰায়মেধিয়ে উক্ত অভিযোগৰ প্ৰসংগত এটা গোচৰ ৰুজু কৰাৰ লগতে জ্যেষ্ঠ আৰক্ষী বিষয়াই সমগ্ৰ ঘটনাটো তদন্ত কৰিব বুলিও জানিব দিছিল।
