দেশৰ মুখ্য ন্যায়াধীশ ৰঞ্জন গগৈয়ে বৃহস্পতিবাৰে অসমৰ ডিটেনশ্যন কেম্পৰ গোচৰৰ পৰা নিজকে অঁতৰাই ৰাখিবলৈ অস্বীকাৰ কৰিছে।
প্ৰাক্তন আমোলা তথা অধিকাৰ কৰ্মী হৰ্ষ মান্দেৰে গোচৰটোৰ শুনানিৰ পৰা মুখ্য ন্যায়াধীশ গগৈক অঁতৰাই ৰখাটো বিচাৰি দাখিল কৰা এখন আবেদন অগ্ৰাহ্য কৰি উচ্চতম ন্যায়ালয়ৰ বিচাৰপীঠখনে আবেদনকাৰীৰ নাম নথিৰ পৰা প্ৰত্যাহাৰ কৰে আৰু আইন সেৱা প্ৰাধিকাৰীক গোচৰটোৰ আবেদনকাৰী হিচাপে নিযুক্তি দিয়ে।
‘’আমি কাকো প্ৰতিষ্ঠানটোত বাধাৰ সৃষ্টি কৰাৰ অনুমতি নিদিওঁ,’’- গোচৰটোৰ শুনানিৰ পৰা নিজকে অঁতৰাই নিবলৈ অস্বীকাৰ কৰি মুখ্য ন্যায়াধীশ ৰঞ্জন গগৈয়ে এইদৰে কয়।
আবেদনকাৰী মান্দেৰৰ পূৰ্বৰ উকীল তথা সৰ্বোচ্চ আদালতখনৰ জ্যেষ্ঠ অধিবক্তা প্ৰশান্ত ভূষণক গোচৰটোৰ বিধি উপদেষ্টা হিচাপে নিযুক্তি দিয়া হৈছে।
মান্দেৰে প্ৰতিষ্ঠানটোৰ বৃহৎ স্বাৰ্থত, ন্যায়ৰ স্বাৰ্থত লেখ আবেদনৰ শুনানিৰ পৰা মুখ্য ন্যায়াধীশ ৰঞ্জন গগৈক অঁতৰাই ৰখাৰ দাবী জনাই আবেদন দাখিল কৰিছিল।
তেওঁ লগতে জানিবলৈ দিছিল যে তেওঁ আৰু গোচৰটোত অধিবক্তা প্ৰশান্ত ভূষণৰ আইনী সেৱা গ্ৰহণ নকৰে।
তেওঁ দাখিল কৰা আবেদনত তেওঁ আন্তৰ্জাতিক মানৱ অধিকাৰৰ প্ৰতি লক্ষ্য ৰাখি ভাৰতীয় সংবিধানৰ আধাৰত কেৱল ইয়াৰ নাগৰিকৰ বাবেই নহয়, লগতে সকলো মানুহৰ বাবে মানৱ অধিকাৰ নিশ্চিত কৰা ইয়াৰ নিজস্ব পৰম্পৰা বৰ্তাই ৰখাৰ বাবে উচ্চতম ন্যায়ালয়ৰ একাগ্ৰতা, মানৱতা আৰু দায়বদ্ধতা বিচাৰিছিল।
তেওঁৰ মতে, আদালতত বিষয়টো যেতিয়া শুনানিৰ বাবে আহিছিল দেশৰ মুখ্য ন্যায়াধীশ ৰঞ্জন গগৈৰ মন্তব্য আৰু মৌখিক বিচাৰে আবেদনকাৰীৰ মনত এক গভীৰ আশংকাৰ সৃষ্টি কৰিছিল যে আবেদনৰ ফলাফলত এক পক্ষপাতিত্বমূলক প্ৰভাৱ পৰা সম্ভাৱনা আছে।
