ওড়িশাত হোৱা প্ৰলয়ংকাৰী ঘূৰ্ণী বতাহ ‘ফেনি’ৰ প্ৰভাৱ অসমতো পৰাৰ সম্ভাৱনা। অৱশ্যে ভাৰতীয় বতৰ বিজ্ঞান কেন্দ্ৰই জাৰি কৰা জাননী অনুসৰি এই ঘূৰ্ণী বতাহ ‘ফেনি’ৰ গতিবগে অসমত কিছু হ্ৰাস পাব। ওড়িশাত ঘণ্টাত ১৭৫ কিলোমিটাৰ গতিবেগত বলা এই ঘূৰ্ণী বতাহ অসম, অৰুণাচল প্ৰদেশ, মেঘালয়, নাগালেণ্ড, মণিপুৰ, মিজোৰাম ত্ৰিপুৰাত ঘণ্টাত ৩০-৪০ কি. মি. গতিবেগত বলাৰ সম্ভাৱনা আছে। অৱশ্যে আজি আৰু কাইলৈ ধাৰাসাৰ বৰষুণ হোৱাৰ সম্ভাৱনা আছে বুলি বতৰ বিজ্ঞান কেন্দ্ৰৰ তথ্যত প্ৰকাশ।
অসমত আজি আৰু কাইলৈ ‘ফেনি’ৰ প্ৰভাৱ পৰাৰ আশংকাত দুটা কেটেগৰীত কেন্দ্ৰীয় বতৰ বিজ্ঞান কেন্দ্ৰই সতৰ্কতা জাৰি কৰিছে। ধুবুৰী, কোকৰাঝাৰ, গোৱালপাৰা, বঙাইগাঁও, চিৰাং, বৰপেটা, কামৰূপত, দক্ষিণ শালমৰা, মানকাচৰ আৰু বাক্সাত কমলাৰঙী আৰু নলবাৰী, কামৰূপ (মহানগৰ), দৰং, মৰিগাঁও, শোণিতপুৰ, কাছাৰ আৰু কৰিমগঞ্জত জাৰি কৰা হৈছে হালধীয়াৰঙী সতৰ্কতা।
কাইলৈ অৰ্থাৎ ৫ মে’ত বঙাইগাঁও, চিৰাং, বৰপেটা, নলবাৰী, বাক্সা, শোণিতপুৰ, ওদালগুৰি, ধুবুৰী, কোকৰাঝাৰ, গোৱালপাৰা, কামৰূপ, কামৰূপ (মহানগৰ), দক্ষিণ শালমৰা মানকাচৰ, নগাঁও, হোজাই, বিশ্বনাথ, পশ্চিম কাৰ্বি আংলং, যোৰহাট, মাজুলী, লখিমপুৰ, ধেমাজিৰ লগতে ডিব্ৰুগড়ত কমলাৰঙী সতৰ্কতা জাৰি কৰিছে।
আনহাতে সুৰক্ষাৰ প্ৰতি লক্ষ্য ৰাখি জিলা প্ৰশাসনে উত্তৰ গুৱাহাটী, ধুবুৰী, যোৰহাট, মাজুলী, ডিব্ৰুগড় শোণিতপুৰ জিলাত ফেৰী চলাচলত নিষেধাজ্ঞা জাৰি কৰিছে।
তাৰোপৰি ৰাইজৰ সুবিধা হোৱাকৈ প্ৰশাসনে ১০৭০, ১০৭৭ আৰু ১০৭৯ বিনামূলীয়া হেল্পলাইন নম্বৰ মুকলি কৰিছে। লগতে স্বাস্থ্য বিভাগেও যিকোনো সহায়ৰ বাবে ০১১–২৩০৬১৩০২/২৩০৬৩২০৫/২৩০৬১৪৬৯ নম্বৰৰ হেল্পলাইন নম্বৰ মুকলি কৰিছে।
