এক লাখ টকা পৰ্য্যন্ত পুৰস্কাৰ ঘোষণাৰে তিনিচুকীয়া জিলাৰ লিডু ব’হাগী উৎসৱে সমগ্ৰ অসমৰ বিহু দল আৰু নাচনীক প্ৰতিযোগিতাত ভাগ লোৱাৰ বাবে আহ্বান জনাইছে।
বিগত বছৰসমূহৰ দৰে এইবছৰো ১০ মে’ৰ পৰা হ’ব লগা তিনিদিনীয়া ব’হাগী উৎসৱটিৰ আয়োজকে যোগাযোগৰ বাবে এটা ফ’ন নম্বৰো মুকলি কৰিছে।
ইচ্ছুক প্ৰতিযোগী বা দলক ৯৩৬৫৭-০৯৩০৫ ম’বাইল নম্বৰত যোগাযোগ কৰিবলৈ অনুৰোধ জনোৱা হ’ল, আয়োজকৰ বিবৃতি।
লিডু ৰে’লৱে ৰঙ্গমঞ্চত হ’বলগা প্ৰতিযোগিতাৰ শ্ৰেষ্ঠ হুঁচৰি দললৈ এক লাখ টকা আৰু দ্বিতীয় শ্ৰেষ্ঠক পঞ্চাছ হাজাৰ টকা পুৰস্কাৰ আগবঢ়োৱা হ’ব।
তাৰোপৰি শ্ৰেষ্ঠা বিহুৱতীক বঁটাসহ ৩০হাজাৰ আৰু শ্ৰেষ্ঠা মৌ-কুঁৱৰীক বঁটাসহ ১৫ হাজাৰ টকা আগবঢ়োৱা হ’ব।
অন্তিম দিনাৰ সাংস্কৃতিক সন্ধিয়াত তেজপুৰীয়া থেচপিয়ান সাংস্কৃতিক দল আৰু দীপলিনা ডেকাই অনুষ্ঠান পৰিৱেশন কৰিব।
অনুষ্ঠানটোৰ সফল উদযাপনৰ বাবে আয়োজকে সকলো শ্ৰেণীৰ ৰাইজৰ উপস্থিতি আৰু সহযোগিতা কামনা কৰিছে।
দীপক চেতিয়াক সভাপতি, ধীৰাজ সোণোৱালক সম্পাদক, জানদ্বীপ ঠাকুলী, নিতু ফুকন আৰু ৰাণাজ্যোতি নাথক সাংস্কৃতিক সম্পাদক হিচাপে লৈ গঠিত উদযাপন সমিতিয়ে ব’হাগী উৎসৱটি সফল কৰাৰ বাবে তৎপৰতা অব্যাহত ৰাখিছে।
