শোণিতপুৰ জিলাৰ অন্তৰ্গত তথা চামগুৰিৰ নিকটৱৰ্তী বুঢ়াচাপৰি বন্যপ্ৰাণী অভয়াৰণ্যৰ ৰক্ষাকবচ স্বৰূপ ধনীয়া গাঁও অঞ্চলত ব্রহ্মপুত্র নৈৰ খহনীয়াই ভয়াৱহ ৰূপ ধাৰণ কৰিছে। অঞ্চলটোত অব্যাহত থকা প্ৰবাল গৰাখহনীয়া ৰোধ কৰিবলৈ প্ৰশাসন ব্যৰ্থ হোৱাত এতিয়া বিনিদ্ৰ ৰজনী কটাবলগীয়া হৈছে অঞ্চলটোৰ নৈ পৰীয়া ৰাইজ।
বিগত ২০১২ চনৰ পৰাই অঞ্চলটোত অব্যাহত থকা ব্ৰহ্মপুত্ৰৰ বিধ্বংসী খহনীয়াই ইতিমধ্যে নিশ্চিহ্ন কৰিছে শিশুআটি, ঝাৰণিকৈ আদি কৰি দুখনকৈ সৰু-বৰ গাঁও। তদুপৰি নিশ্চিহ্ন হৈছে কৃষিভূমি, মানুহৰ ঘৰ-দুৱাৰৰ লগতে বিভিন্ন চৰকাৰী-বেচৰকাৰী অনুষ্ঠান-প্ৰতিষ্ঠান।
প্ৰতিবছৰৰ দৰে এই বছৰো অঞ্চলটোত আৰম্ভ হৈছে খহনীয়া। ব্যাপক ৰূপত অব্যাহত থকা খহনীয়াই ধনীয়া গাঁৱৰ প্ৰায় দুকুৰি পৰিয়ালৰ ঘৰ-বাৰি, মাটি-ভেটি বাৰিষাৰ শেষলৈকে নিশ্চিহ্ন কৰিব বুলি অঞ্চলবাসীয়ে ব্যক্ত কৰিছে।
যদিহে ব্ৰহ্মপুত্ৰৰ বুকুত এই গাঁওখন জাহ যায় তেন্তে ভয়াবহ সংকট নামি আহিব গাঁওখনৰ কাষতে লাগি থকা বুঢ়াচাপৰি বন্যপ্ৰাণী অভয়াৰণ্য খনলৈও।
শোণিতপুৰ জিলাৰ অন্তৰ্গত এই গাঁওখন ব্ৰহ্মপুত্ৰ নদীৰ দক্ষিণ পাৰে অৱস্থিত হোৱা হেতুকে অঞ্চলটো চৰকাৰীভাবে উপেক্ষিত হৈ ৰোৱা বুলি গুৰুতৰ অভিযোগ তুলিছে স্থানীয় ভুক্তভোগি ৰাইজে।
মথাউৰি নিৰ্মাণ তথা বছৰ-বছৰ ধৰি ব্ৰহ্মপুত্ৰৰ দাঁতিকাষৰীয়া এই বৃহত্তৰ অঞ্চলটোত অব্যাহত থকা গৰাখহনীয়া ৰোধ কৰিবৰ বাবে চৰকাৰী আঁচনিতো দূৰৈৰে কথা আজি পৰ্যন্ত দুৰ্দশাগ্ৰস্ত গাঁওবাসীৰ অৱস্থাৰ বুজ ল’বলৈ বিভাগীয় মন্ত্ৰী-বিধায়ক তথা আমোলা-বিষয়া কোনোৱে উপস্থিত নোহোৱা বুলি সংবাদ মাধ্যমক জানিবলৈ দিয়ে।
এতিয়া চৰকাৰী ব্যৱস্থাৰ প্ৰতি গাঁওখনৰ ৰাইজে আশা কৰাৰ বিপৰীতে ক্ৰমশঃ কালন্তক ৰূপ ধাৰণ কৰা মহাবাহুৰ খহনীয়া যাতে ইমানতেই যেন অন্ত পৰে তাৰ বাবে অসহায় দৃষ্টিৰে চাই ৰৈছে অঞ্চলবাসী।
