অন্ধবিশ্বাস আৰু কু-সংস্কাৰৰ পৰিণতিত পুনৰ এক বৃদ্ধ দম্পতি ৰাজহুৱা আক্ৰমণৰ বলি হ’ব লগা হৈছে। কামৰূপ জিলাৰ অসম-মেঘালয় সীমান্তৰ দগাঁৱত শনিবাৰে নিশা এনে এক সমাজক লজ্জানত কৰা ঘটনা সংঘটিত হয়। এই ঘটনাত গাঁওখনৰ এক বৃদ্ধ দম্পতিক ডাইনী সন্দেহত আক্ৰমণ কৰি ৰাজহুৱাভাৱে প্ৰহাৰ কৰা হয়।
ঘটনা অনুসৰি ডাইনী সন্দেহত অঞ্চলটোৰ লোকে লুইণ্ড চাংমা (৮০) আৰু প্ৰিটিলা চাংমাক (৬৫) বেয়াকৈ প্ৰহাৰ কৰে। ঘটনাৰ পাছতে বকো আৰক্ষীয়ে দুয়োজনকে ঘটনাস্থলীৰ পৰা উদ্ধাৰ কৰে।
আহত দম্পতিক প্ৰথমতে বকো প্ৰাথমিক স্বাস্থ্যকেন্দ্ৰত ভৰ্তি কৰা হয় যদিও পাছত উন্নত চিকিৎসাৰ বাবে গুৱাহাটী চিকিৎসা মহাবিদ্যালয় আৰু হাস্পাতললৈ প্ৰেৰণ কৰা হয়। বৰ্তমান দুয়োজনেই গুৱাহাটী চিকিৎসা মহাবিদ্যালয় হাস্পাতলত চিকিৎসাধীন হৈ আছে।
উক্ত ঘটনা সন্দৰ্ভত আৰক্ষীয়ে কোনো লোকক এতিয়ালৈকে গ্ৰেপ্তাৰ কৰা নাই বুলি জানিব দিয়ে বকো আৰক্ষী থানাৰ ভাৰপ্ৰাপ্ত বিষয়া যোগেন বৰ্মনে।
ঘটান সংক্ৰান্ত তদন্ত অব্যাহত ৰখাৰ লগতে আৰক্ষীয়ে এটা গোচৰ ৰুজু কৰাৰো প্ৰস্তুতি চলাই থকাৰ কথা জানিব পৰা গৈছে।
ডাইনীৰ নামত নিৰীহ লোকক এইদৰে ৰাজহুৱাভাৱে আক্ৰমণৰ ঘটনা ৰাজ্যখনত সময়ে সময়ে সংঘটিত হৈ আহিছে যদিও এইক্ষেত্ৰত চৰকাৰে কঠোৰ পদক্ষেপ গ্ৰহণ কৰা পৰিলক্ষিত হোৱা নাই।
