ৰাজ্যত ক্ৰমান্বয়ে বাইক চুৰি চক্ৰৰ সংখ্যা বৃদ্ধি পোৱাৰ সময়তে কালি অৰ্থাৎ দেওবাৰে নিশা তিনিটাকৈ গভাইত বাইক চোৰ দৰং আৰক্ষীৰ জালত পৰে।
জিলা আৰক্ষী অধীক্ষক অম্ৰিত ভূঞাৰ নিৰ্দেশত মঙলদৈ আৰক্ষী থানাৰ এটা দলে দেওবাৰে দলংঘাটৰ মিথুন বড়ো নামৰ লোক এজনৰ বাসগৃহত অভিযান চলাই চুৰি হোৱা এখন মটৰ চাইকেল জব্দ কৰে।
ইয়াৰ পিছতে আৰক্ষীৰ দলটোৱে মিথুন বড়োক সোধা-পোচা কৰাত বাইক চুৰি চক্ৰৰ সৈতে জড়িত আন দুজন চোৰ ক্ৰমে শাৰাবাৰীৰ বিপুল শৰ্মা আৰু বেজপাৰাৰ অভিজিৎ ডেকাক আটক কৰে। ইয়াৰ উপৰি চোৰ দুজনৰ কৱলৰ পৰা এখন মটৰ চাইকেলো জব্দ কৰে।
উল্লেখ্য যে আটকাধীন বিপুল শৰ্মা ইয়াৰ পূৰ্বেও বহুবাৰ চুৰি কাৰ্যৰ লগত জড়িত থকাৰ অভিযোগত কাৰাবাস খাটিছিল।
ইফালে বাইক চক্ৰটোৱে জিলাখনত কেনেধৰণৰ কাৰ্যকলাপ সংঘটিত কৰিছিল বা এই চক্ৰটোৰ সৈতে আৰু কোনোবা লোক জড়িত আছে নেকি সেই সন্দৰ্ভত আৰক্ষীয়ে বৰ্তমান সোধা-পোচা অব্যাহত ৰাখিছে।
