চৌদিশে ঈদৰ উছাহ চলি থকাৰ মাজতে মেঘালয়ত এজন অচিনাক্ত ব্যক্তিক কেইজনমান যুৱকে সম্পূৰ্ণ উলংগ কৰি অতি নিৰ্মমভাৱে মাৰপিট কৰা এটা ভিডঅ’ ভাইৰেল হৈ পৰিছে হোৱাটছ এফকে ধৰি ছ’চিয়েল মিডিয়াত।
ঘটনাটোৰ স্থান আৰু যুৱককেইজনৰ পৰিচয় সম্পৰ্কত এই পৰ্য্যন্ত সম্পূৰ্ণ নিশ্চিত হ’ব পৰা নাই যদিও প্ৰহৃত ব্যক্তিজনৰ মুখত দীঘল দাঢ়ি দেখা গৈছে আৰু তেওঁ প্ৰহাৰৰ যন্ত্ৰণাত কেইবাবাৰো আল্লা বুলি চিঞৰা শুনা গৈছে। তেওঁ যুৱককেইজনক হাতযোৰ কৰি ক্ষমাও বিচাৰে।
মানুহজনৰ কাকূতি-মিনতিৰ প্ৰতি সমূলি অনুকম্পা নেদেখুওৱাকৈ উপৰ্য্যুপৰি ঘোচা, গোৰ আদিৰে প্ৰহাৰ কৰি যোৱা যুৱককেইজনৰ চেহেৰা-পাতিত খাচি সম্প্ৰদায়ৰ বৈশিষ্ট্য স্পষ্ট। তেওঁলোকে আটাইকেইজনে একেলগে বিভিন্ন দিশৰ পৰা মানুহজনৰ বুকু, মূৰ আৰু মুখমণ্ডলত ঘোচা, গোৰ শোধায়। আনকি তেওঁৰ গুপ্তাংগতো আঘাত কৰে যুৱককেইজনে।
ভিডিঅ’টোত ঘটনাটোৰ পটভূমি হিচাপে যিটো জনহীন যেন লগা ঘৰ দেখা গৈছে সেইটো আৰু আন দৃশ্যমান অংশবোৰে এয়া খাচি লোকালয় বুলি বিশ্বাস জন্মায়। এটা সূত্ৰৰ মতে, ঘটনাস্থল পশ্চিম খাচি পাহাৰ জিলাৰ ৰাণীকোৰ নামৰ ঠাই আৰু যুৱককেইজন সেই ঠাইখনৰে।
ঘটনাটোৰ সময়ত ওচৰত কোনো জ্যেষ্ঠ মানুহ বা যুৱকেকেইজনৰ বাদে আন মানুহৰ উপস্থিতি দেখা নাযায়।
ঈদৰ আগনিশা হোৱাটছ এপত দ্ৰুতভাৱে বিয়পি পৰা ভিডিঅ’টো কোনে ৰেকৰ্ডিং কৰিলে বা কোন উৎসৰ পৰা আহিল সেই সম্পৰ্কেও একো নিশ্চিত তথ্য পোৱা হোৱা নাই।
মেঘালয়ৰ আৰক্ষী সঞ্চালক প্ৰধানক এই সন্দৰ্ভত নৰ্থ-ইষ্ট নাওৰ পৰা যোগাযোগ কৰাত তেওঁ ভিডিঅ’টো সম্পৰ্কে এতিয়ালৈকে একো কথা জ্ঞাত নহয় আৰু ইয়াৰ অনুসন্ধান কৰিবলৈ তেওঁ বিষয়াসকলক নিৰ্দেশ দিয়া বুলি জনায়।
“ঘটনাটো কেতিয়া হৈছিল জানিব পৰা হোৱা নাই। ভুক্তভোগী মানুহজনৰ পৰিচয় উদ্ধাৰৰ চেষ্টাও কৰি থকা হৈছে”, পশ্চিম খাচি পাহাৰ জিলাৰ আৰক্ষী অধীক্ষক মেক্সৱেল ছিয়েমে কয়।
https://www.facebook.com/nenownews/videos/1275048202643802/
