কাছাৰ বন বিভাগে আজি কাছাৰ জিলাৰ ধলাই সমষ্টিৰ বনবিভাগৰ অন্তৰ্গত ৰজনীখাল অঞ্চলৰ ৮২ টা পৰিয়ালৰ ওপৰত উচ্ছেদ অভিযান চলাই। ৮২ টা পৰিয়ালৰ প্ৰায় ৫০০ গৰাকী লোক বন বিভাগৰ দ্বাৰা চলোৱা উচ্ছেদ অভিযানৰ ফলত উচ্ছেদিত হ’বলগীয়া হয়।
আজি পুৱা ৬ বজাৰ পৰা বন বিভাগৰ প্ৰায় ১১০ গৰাকী বিষয়া কৰ্মচাৰী আৰু আৰক্ষী বাহিনীৰ ২০০ গৰাকী জোৱানেৰে গঠিত এটা বৃহৎ দলে অঞ্চলটোত উচ্ছেদ অভিযান আৰম্ভ কৰে।
ৰাতিপুৱা বন বিভাগ আৰু আৰক্ষীৰ সুসজ্জিত বাহিনীটোৱে ধলাই চহৰৰ পৰা ৰজনীখাললৈ প্ৰায় পাঁচ কিলোমিটাৰ পথ খোজকাঢ়ি আহি দহটা হাতী, তিনিখন জেচিবিৰে অঞ্চলটোত অবৈধভাৱে নিৰ্মাণ কৰা ঘৰসমূহ এফালৰ পৰা উচ্ছেদ কৰি যায়।
উচ্ছেদকাৰী দলটোৰ অভিযানত বৰষুণে কিছু বাধাৰ সৃষ্টি কৰিলেও হাতী আৰু জেচিবিৰ সহায়ত দলটোৱে উচ্ছেদ অভিযান অব্যাহত ৰাখে। আনকি মানুহৰ ঘৰৰ তামোল গছ পৰ্য্যন্ত হাতীৰ সহায়ত ভাঙি পেলোৱা হয়।
অঞ্চলটোত বাস কৰি থকা লোকসকলে আগতীয়াকৈ এনেধৰণৰ উচ্ছেদৰ বাবে সাজু থকাৰ বাবে তেওঁলোকে নিজৰ প্ৰয়োজনীয় সা-সামগ্ৰী সমূহ আঁতৰাই থৈছিল। প্ৰশাসনে জাননি জাৰি কৰি পূৰ্বতে ২১ মে’ অন্তিম সময়সীমা বান্ধি দিছিল।
‘‘আমি এইবাৰ উচ্ছেদৰ ভয়ত ভালকৈ ঈদো পালন কৰিব নোৱাৰিলো। আমি এতিয়া ক’লৈ যাম? এই অঞ্চলত বিগত ৩৫-৪০ বছৰ ধৰি আমি বাস কৰি আছো। এনেদৰে উচ্ছেদ কৰাতকৈ আমাক মাৰি পেলোৱাই ভাল’’ চামিনা বেগম নামৰ এগৰাকী ভূক্তভোগীয়ে নৰ্থ-ইষ্ট নাওৰ সাংবাদিকৰ আগত এইদৰে কয়।
কাছাৰৰ খণ্ড বন বিষয়া চানি দেও চৌধুৰীয়ে উচ্ছেদ সন্দৰ্ভত বন বিভাগে প্ৰয়োজনীয় বাহিনীৰ সৈতে উচ্ছেদ অভিযানত অংশ লৈছে বুলি উল্লেখ কৰি কয় যে অবৈধভাৱে বন বিভাগৰ ভূমি বেদখলকৰ কৰি থকা লোকসকলে প্ৰায় ২৮৬ বিঘা ভূমি বেদখল কৰি আছিল। আমি অতি শীঘ্ৰে এই অঞ্চলসমূহ বেদখলমুক্ত কৰি সেই ঠাইসমূহত গছ পুলি ৰোপণ কৰাৰ কৰাৰ আঁচনি গ্ৰহণ কৰিছো।
আচৰিতভাৱে, উচ্ছেদ অভিযান চলোৱা অঞ্চলটোত বিদ্যুৎ সংযোগ, বিদ্যালয় গৃহ, মছজিদ আনকি ইন্দিৰা আৱাস যোজনাৰ ঘৰো অবৈধভাৱে বসবাস কৰি থকা লোকসকলে লাভ কৰিছে বুলি এজন উচ্ছেদিত নাগৰিকে কৰা মন্তব্যই সমগ্ৰ ঘটনা প্ৰসংগত প্ৰশ্নবোধকৰ সৃষ্টি কৰিছে। কাৰ ছত্ৰছায়াত উচ্ছেদ অভিযান চলোৱা অঞ্চলটোৰ ৰাইজে এইবোৰ চৰকাৰী সা-সুবিধা লাভ কৰি আছিল বৰ্তমান সময়ত এইটো এটা লাখটকীয়া প্ৰশ্ন হিচাপে বিৱেচিত হৈছে।
