নলাবাৰী সাহিত্য সভাৰ উদ্যোগত আৰু লখিমী শাখা সাহিত্য সভাৰ সহযোগত নলবাৰী লিটিল ফ্লাৱাৰ্ছ স্কুলত গীতিকবি পাৰ্বতি প্ৰসাদ বৰুৱাৰ স্মৃতি দিৱস অনুষ্ঠানত গীত পৰিবেশন কৰি থকাৰ সময়তে ঢলি পৰি আকস্মিক মৃত্যুক সাবটি লয় নলবাৰীৰৰ প্ৰবীণ কন্ঠশিল্পী তথা সমাজ কৰ্মী শ্যামসুন্দৰ দত্তই।
অনুষ্ঠানটোৰ উদ্বোধক হিচাপে অংশলোৱা শিল্পীগৰাকীয়ে পাৰ্বতি প্ৰসাদ বৰুৱাৰ ‘গৰখীয়া হেৰ’ গৰখীয়া’ আৰু ‘পূজো আহা আই মাতৃ’ শীৰ্ষক গান দুটি গোৱাৰ পাছতে হঠাৎ অসুস্থ অনুভৱ কৰি চকীত ঢলি পৰে।
উদ্যোক্তাসকলে শিল্পীগৰাকীক নলবাৰীৰ সাৰথি নামৰ ব্যক্তিগত নাৰ্ছিং হোমখনত ভৰ্তি কৰে যদিও চিকিৎসকে দত্তক মৃত বুলি ঘোষণা কৰে। মৃত্যুৰ সময়ত তেখেতৰ বয়স আছি ৭৮ বছৰ।
আনহাতে, অনুষ্ঠানৰ মাজত প্ৰবীণ শিল্পীগৰাকীৰ আকস্মিক মৃত্যুত নলবাৰী জিলা সাহিত্য সভা, নলবাৰী জিলা ছাত্ৰ সন্থা আৰু অন্যান্য জাতীয় দল-সংগঠনসমূহে গভীৰ শোক প্ৰকাশ কৰে।
অনাতাঁৰ শিল্পী শ্যমসুন্দৰ দত্তই কন্ঠশিল্পী হিচাপে অসমৰ বিভিন্ন অনুষ্ঠানৰ লগতে দিল্লীৰ পৰাও কেইবাটাও বঁটা লাভ কৰি জিলাখনলৈ গৌৰৱ কঢ়িয়াই আনিছিল। সুধাকন্ঠ ভূপেন হাজৰিকা আৰু পাৰ্বতি প্ৰসাদ বৰুৱাৰ গীত গাই জনপ্ৰিয়তা লাভ কৰা দত্তই মৃত্যুৰ সময়ত পত্নী, তিনিজন পুত্ৰ, এগৰাকী কন্যাৰ উপৰিও ভালেসংখ্যক গুণমুগ্ধক ইহসংসাৰত এৰি যায়।
নলবাৰীৰ বিভিন্ন শিক্ষানুষ্ঠান আৰু সামাজিক অনুষ্ঠানৰ লগত প্ৰত্যক্ষভাৱে জড়িত শিল্পীৰগৰাকীৰ মৃত্যুত সমগ্ৰ নলবাৰী চহৰত শোকৰ ছাঁ পৰে।
