চিকিৎসা বিজ্ঞান পঢ়াৰ ইচ্ছা পুহি ৰখা অসমৰ দৰিদ্ৰ শ্ৰেণীৰ ছাত্ৰ-ছাত্ৰীসকলৰ বাবে এক সুখবৰ। ভাৰতীয় চিকিৎসা পৰিষদ অৰ্থাৎ মেডিকেল কাউন্সিল অৱ ইণ্ডিয়াই আৰ্থিকভাৱে দুৰ্বল শ্ৰেণীৰ সংৰক্ষণ ব্যৱস্থাৰ অধীনত অসমৰ ছখন চিকিৎসা মহাবিদ্যালয়ত এম বি বি এছ পাঠ্যক্ৰমত অতিৰিক্ত ১৭৪খন আসন বৃদ্ধিৰ অনুমোদন জনাইছে।
সেই অনুসৰি চলিত ২০১৯-২০ শিক্ষা বৰ্ষৰ পৰা অসমৰ ৬খন মেডিকেল কলেজত মুঠ আসনৰ সংখ্যা বৰ্তমানৰ ৭২৬খনৰ পৰা ৯০০ খনলৈ বৃদ্ধি পাব। কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ৰ কালি অৰ্থাৎ শুকুৰবাৰে জাৰি কৰা এক নিৰ্দেশনা অনুসৰি এয়া কাৰ্যকৰী কৰা হ’ব।
ৰাজ্যৰ স্বাস্থ্য মন্ত্ৰী হিমন্ত বিশ্ব শৰ্মাই কালি এই কথা সদৰী কৰে।
উক্ত কেন্দ্ৰীয় নিৰ্দেশনা অনুসৰি ডিব্ৰুগড়স্থিত অসম মেডিকেল কলেজত বৰ্তমানৰ ১৭০ খনৰ পৰা ২০০ খনলৈ, গুৱাহাটী মেডিকেল কলেজত ১৫৬খনৰ পৰা ২০০খনলৈ, বৰপেটাৰ ফখৰুদ্দিন আলী আহমেদ মেডিকেল কলেজত চলিত ১০০খনৰ পৰা ১২৫ খনলৈ, যোৰহাট মেডিকেল কলেজত ১০০খনৰ পৰা ১২৫খনলৈ, তেজপুৰ মেডিকেল কলেজত ১০০খনৰ পৰা ১২৫খনলৈ আৰু শিলচৰ মেডিকেল কলেজত ১০০খনৰ পৰা ১২৭খনলৈ আৰু আসন বৃদ্ধি পাব।
