ৰাজ্যত এতিয়া ভয়াৱহ ৰূপ ধাৰণ কৰিছে জাপানীজ এনকেফেলাইটিছে। ন ন অঞ্চললৈ সম্প্ৰসাৰিত হ’বলৈ ধৰিছে এই ভয়াবহ ৰোগ। এইবাৰ নগাঁৱৰ পুৰণিগুদামৰ এগৰাকী মহিলা জাপানীজ এনকেফেলাইটিছত আক্ৰান্ত হোৱা বুলি জানিব পৰা গৈছে।
বিগত কিছুদিন ধৰি পুৰণিগুদাম হাতীগাঁৱৰ ননী দেৱী নামৰ মহিলাগৰাকী বিভিন্ন ৰোগত আক্ৰান্ত হৈ গুৱাহাটীৰ দিছপুৰ চিকিৎসালয়ত চিকিৎসাধীন হৈ আছিল। শেহতীয়াকৈ মহিলাগৰাকী জাপানীজ এনকেফেলাইটিছ ৰোগত আক্ৰান্ত হোৱা বুলি চিকিৎসকে জানিব দিয়ে।
সম্প্ৰতি দিছপুৰ হস্পিতালত মৃত্যুৰ সৈতে যুঁজি আছে মহিলাগৰাকী।
উল্লেখ্য যে, এই পৰ্যন্ত নগাঁও জিলাত এই ৰোগৰ ফলত ৭জন লোকৰ মৃত্যু হোৱাৰ বিপৰীতে ২২জনৰো অধিক লোক চিকিৎসাধীন হৈ আছে চিকিৎসালয়ত।
ইফালে ভয়াবহ এই ৰোগৰ পৰা সমগ্ৰ অঞ্চলবাসীক শংকামুক্ত কৰিবৰ বাবে বিহিত ব্যৱস্থা গ্ৰহণ কৰিবৰ বাবে সংশ্লিষ্ট স্বাস্থ্য বিভাগক আহ্বান জনাইছে পুৰণিগুদামৰ অঞ্চলবাসীয়ে।
চৰকাৰী তথ্য অনুসৰি এই ৰোগৰ ফলত বৰ্তমানলৈকে সমগ্ৰ ৰাজ্যতে ৫০ ৰো অধিক লোকে প্ৰাণ হেৰুৱাব লগীয়া হৈছে।
