বিগত চাৰিদিন ধৰি হৈ থকা প্ৰৱল বৃষ্টিপাতৰ বাবে অসমত বানপানী আৰু উত্তৰ-পূবৰ বাকীবোৰ ৰাজ্যত ভূমিস্খলনে ভয়াবহ ৰূপ ধাৰণ কৰিছে।
ৰাজ্যৰ শোচনীয় বান পৰিস্থিতিৰ সময়তে বৰঝাৰত থকা গুৱাহাটী আঞ্চলিক বতৰ বিজ্ঞান কেন্দ্ৰই ৰাজ্যখনৰ আগন্তুক এসপ্তাহৰ আগলি বতৰৰ বতৰা জাৰি কৰিছে।
বতৰ বিজ্ঞান কেন্দ্ৰই জাৰি কৰা জাননী অনুসৰি এই সময়ছোৱাত সাগৰীয় নিম্ন চাপৰ বাবে দক্ষিণ-পূব মৌচুমী বতাহ দক্ষিণ পঞ্জাৱৰ পৰা হাৰিয়ানা আৰু উত্তৰ-প্ৰদেশৰ মাজেৰে আহি নাগালেণ্ডত প্ৰৱেশ কৰাৰ সম্ভাৱনা আছে।
আনহাতে, আন এটা মৌচুমী বায়ুৰ প্ৰভাৱ বংগোপ সাগৰৰ পৰা বিহাৰ,ঝাৰখণ্ড আৰু পশ্চিম বংগৰ মাজেৰে আহি অসমত প্ৰৱেশ কৰিব।
এই সময়ছোৱাত অৰ্থাৎ ১২ জুলাইৰ পৰা ১৮ জুলাইলৈ অসমত মজলীয়া ধৰণৰ বৰষুণ হ’ব একমাত্ৰ উত্তৰ-পূবৰ মণিপুৰত এই সময়ছোৱাত সাধাৰণ পৰিমানৰ বৰষুণ হ’ব।
আনহাতে, ১৯ জুলাইৰ পাছত অসমৰ লগতে উত্তৰ-পূবত বৰষুণৰ পৰিমান স্বাভাৱিক হোৱাৰ সম্ভাৱনা আছে।
ৰাজ্যৰ চৌদিশে বানপানীৰ তাণ্ডৱলীলা চলি থকাৰ সময়তে বতৰ বিজ্ঞান কেন্দ্ৰৰ আগলী বতৰাই ৰাজ্যৰ বান পৰিস্থিতি উন্নত নোহোৱাৰে ইংগিত বহন কৰিছে।
ইতিমধ্যে অসম চৰকাৰে বিভাগীয় জিলা উপায়ুক্ত আৰু বিষয়াসকলৰ সৈতে বানপৰিস্থিতি সন্দৰ্ভত আলোচনা অব্যাহত ৰাখিছে আৰু ইয়াৰ বাবে প্ৰয়োজনীয় ব্যৱস্থা গ্ৰহণ কৰাৰ বাবে সকলো বিভাগক নিৰ্দেশ দিছে।
