শেহতীয়া ছবি ‘বুলবুল কেন ছিং’ৰ জৰিয়তে পৰিচালিকা ৰীমা দাসে পুনৰ এবাৰ অসমলৈ গৌৰৱ কঢ়িয়াই আনিছে। এইবাৰ ‘ইণ্ডিয়ান ফিল্ম ফেষ্টিভেল অব মেলব’ৰ্ন’ত বিশেষ পুৰস্কাৰ লাভ কৰে এই ছবিখনে।
সন্মানীয় ফেষ্টিভেলখনত বুলবুল কেন ছিং ছবিখনে শ্ৰেষ্ঠ ভাৰতীয় ছবিৰ সন্মান লাভ কৰিবলৈ সক্ষম হৈছে।
উল্লেখ্য যে ৰীমা দাসৰ উপৰি অসমৰ আন এগৰাকী যশস্বী পৰিচালক জাহ্নু বৰুৱাৰ ‘ভগা খিৰিকী’ নামৰ ছবিখনেও শ্ৰেষ্ঠ ছবিৰ মনোনয়ন লাভ কৰিছিল। তদুপৰি দুইগৰাকী অসমীয়া পৰিচালকে শ্ৰেষ্ঠ পৰিচালকৰো মনোনয়ন লাভ কৰিছিল।
ইফালে ইণ্ডিয়ান ফিল্ম ফেষ্টিভেল অব মেলব’ৰ্নত প্ৰদৰ্শিত বুলবুল কেন ছিং ছবিখন উপভোগ কৰি আপ্লুত হৈ পৰে প্ৰদৰ্শনী অনুষ্ঠানত মুখ্য অতিথিৰূপে উপস্থিত থকা বলিউদৰ তাৰকা তথা ‘কিং খান’ ৰূপে পৰিচিত শ্বাহৰুখ খান।
ভিলেজ ৰকষ্টাৰ্ছৰ সীমাহীন সফলতাৰ পিছত ৰীমা দাসৰ পৰিচালনাত নিৰ্মিত বুলবুল কেন ছিং ছবিখনেও ইতিমধ্যে ৰাষ্ট্ৰীয় তথা বিভিন্ন আন্তঃৰাষ্ট্ৰীয় ফেষ্টিভেলত বিভিন্ন সন্মান আঁজুৰি আনিবলৈ সক্ষম হৈছে।
উল্লেখ্য যে অসমৰ গাঁও এখনৰ এগৰাকী কিশোৰীক কেন্দ্ৰ কৰি নিৰ্মাণ কৰা বুলবুল কেন ছিং ছবিখনৰ চিত্ৰনাট্য, কাহিনী আৰু নিৰ্দেশনা হৈছে ৰীমা দাসৰ। ছবিখনত অভিনয় কৰিছে পাকিজা বেগম, অৰ্ণালী দাস, বানবেন্দ্ৰ দাস, মনোৰঞ্জন দাস আৰু বনিতা ঠাকুৰীয়াই।
