দিল্লীৰ এখন ৰেষ্টুৰেণ্টত কাম কৰি থকা দুজন নাগা যুৱকক যোৱা ৰাতি একাংশ দুৰ্বৃত্তই আক্ৰমণ কৰে।
ঘটনাটোৱে ‘ৰাষ্ট্ৰীয় ৰাজধানীৰ বাসিন্দাই উত্তৰ-পূবৰ যুৱক-যুৱতীসকলক সমান মান-মৰ্য্যাদা আৰু অধিকাৰ থকা ভাৰতীয় বুলি নাভাবে’ ধাৰণাটোক আকৌ সত্য প্ৰমাণ কৰিলে।
দিল্লীস্থিত নাগা ছাত্ৰ সন্থাৰ এজন বিষয়ববীয়াই জনোৱামতে, যুৱক দুজনে দক্ষিণ দিল্লীৰ হৌজখাছ গাঁৱত থকা এখন ৰেষ্টুৰেণ্ট ঔৰাম (Aurum)ত কাম কৰিছিল। তেওঁলোক দেওবাৰে কাম কৰি উভতি আহোতে এই দুৰ্ভাগ্যজনক ঘটনাটো ঘটে।
পথত থকা এদল মানুহে কোনো কাৰণ নোহোৱাকৈয়ে তেওঁলোকৰ সৈতে প্ৰথমে বিভিন্ন ধৰণৰ অভদ্ৰামি আৰু দুৰ্ব্যৱহাৰ কৰে।
বিপদৰ উমান পাই দুয়োজন যুৱকে নিজকে বচাবলৈ দৌৰে যদিও ছজন লোকে তেওঁলোকক খেদি যায় আৰু লাঠীৰে প্ৰহাৰ কৰে। এজন যুৱকক ভগা বীয়েৰ বটলেৰে দুবাৰকৈ আঘাত কৰা হয়। বিষয়ববীয়াজনে কয়।
দুয়োকে প্ৰহাৰ কৰাৰ পিছত দলটোৱে দুয়োকে হুমকি দিয়ে আৰক্ষীক অৱগত নকৰিবলৈ। আৰক্ষীক এজাহাৰ দিলে ভয়ংকৰ পৰিণামৰ সন্মুখীন হ’ব বুলি ভাবুকি দিয়ে।
দিল্লী আৰক্ষীয়ে ইতিমধ্যে অভিযুক্তসকলৰ তিনিজনক গ্ৰেপ্তাৰ কৰিছে।
নাগা ষ্টুডেণ্টছ য়ুনিয়ন, দিল্লীয়ে ঘটনাৰ সৈতে জড়িতসকলক সোনকালে গ্ৰেপ্তাৰ কৰিবলৈ আৰু উচিত শাস্তি দিবলৈ দাবী তুলিছে।
“এইটো উদ্বেগৰ কথা যে উত্তৰ-পূবৰ লোকসকল দিল্লীত বৰ্ণবিদ্বেষমূলক আক্ৰমণৰ বলি হৈ আহিছে। এইটোৱে প্ৰথম ঘটনা নহয়”, নাগা ছাত্ৰনেতাজনে কয়। তেওঁ ৰাজ্যৰ বাহিৰত থকা নাগা লোকসকলৰ নিৰাপত্তা নিশ্চিত কৰাৰ বাবে আহ্বান জনায়।
