শুকুৰবাৰে মাজনিশা এক বিধ্বংসী অগ্নিকাণ্ডৰ ফলত শিৱসাগৰ অসামৰিক চিকিৎসালয়ৰ সন্মুখত থকা কেইবাখনো ঔষধৰ দোকান জুইত জাহ যায়।
নিশা প্ৰায় ১ মান বজাত মেডিচিন চেন্টাৰ নামৰ ঔষধৰ দোকানত জুইৰ সুত্ৰপাত ঘটে।
এই অগ্নিকাণ্ডত মেডিচিন চেন্টাৰ নামৰ ঔষধৰ দোকানখন সম্পূৰ্ণৰূপে জুইত জাহ যায়।
আনহাতে, ইয়াৰ লগতে লাগি থকা দুখন ঔষধৰ দোকান কম বেচি পৰিমাণে ক্ষতিগ্ৰস্ত হয়।
প্ৰাথমিকভাৱে, চৰ্ট চাৰ্কিটৰ ফলতেই এই অগ্নিকাণ্ড সংঘটিত হোৱা বুলি ধাৰণা কৰা হৈছে।
অগ্নিকাণ্ডটো ইমানেই ভয়ংকৰ আছিল যে তিনিখন অগ্নিনিৰ্বাপক গাড়ীয়ে আধাঘন্টাতকৈয়ো অধিক সময় ধৰি চলোৱা প্ৰচেষ্টাৰ অন্ততহে অগ্নি নিৰ্বাপন কৰিবলৈ সক্ষম হয়।
অগ্নিকাণ্ডৰ ফলত ৰাতি চিকিৎসালয়ৰ চৌহদত এক আতংকময় পৰিবেশৰ সৃষ্টি হয়।
অগ্নিকাণ্ডটোত মেডিচিন চেন্টাৰৰ বহু টকাৰ সামগ্ৰী বিনষ্ট হয়।
অৱশ্যে, সময়মতে অগ্নি নিৰ্বাপক বাহিনী ঘটনাস্থলীত উপস্থিত হোৱাৰ বাবে অঞ্চলটো এক ভয়ংকৰ পৰিস্থিতিৰ পৰা ৰক্ষা পৰে।
