শিৱসাগৰ আৰক্ষী অধীক্ষক অমিতাভ সিনহাই বিভাগীয় শাস্তিৰ নামত প্ৰচণ্ড গৰমত শিৱসাগৰ বৰপুখুৰীৰ পাৰত এজন অসুখীয়া জোৱানক দৌৰিবলৈ দিয়াৰ ফলত বেয়াকৈ অসুস্থ হৈ পৰা জোৱানজনৰ যোৱা নিশা চিকিৎসালয়ত মৃত্যু ঘটিছে।
নিজৰ বিভাগৰে অত্যাচাৰত মৃত্যু হোৱা দুৰ্ভগীয়া জোৱানজন হ’ল ৫০ বছৰীয়া পৰামানন্দ ইয়েন।
ইয়েনক অসুস্থ হৈ পৰাৰ পিছত পৰিয়ালৰ লোকে ২৭ আগষ্টৰ ৰাতি আঠ বজাত ব্যক্তিগত খণ্ডৰ এখন চিকিৎসালয়ত ভৰ্তি কৰিছিল যদিও যোৱা নিশা তেওঁৰ মৃত্যু হয়।
ইয়েনৰ পত্নীয়ে জনোৱা মতে, তেওঁ জয়সাগৰ আৰক্ষী চকীত কৰ্মৰত হৈ থকা অৱস্থাত আজিৰ পৰা প্ৰায় এসপ্তাহৰ পূৰ্বে চকীৰ ভিতৰত লক-আপৰ দৃশ্য আদি ম’বাইলেৰে ৰেকৰ্ডিং কৰাক লৈ আক্ৰাছু নামৰ সংগঠনটোৰ সদস্যৰ দল এটাৰ সৈতে তৰ্কাতৰ্কি হৈছিল।
তেতিয়া সংগঠনটোৰ সদস্যকেইজনে কৰ্তব্যৰত অৱস্থাত খাকী পোচাকত হাত দিয়ত আৰক্ষী জোৱানকেইজন আৰু যুৱকৰ দলটোৰ মাজত হতাহতি হয়।
ঘটনাৰ পিছতে যুৱকৰ দলটোৱে জিলা আৰক্ষী অধীক্ষক অমিতাভ সিনহাক অৱগত কৰে।
অৱশ্যে আক্ৰাছু নামৰ সংগঠনটোৰ নেতাকেইজনে কোনো লিখিত গোচৰ দিয়া নাছিল। ইয়াৰ বিপৰীতে যুৱককেইজনে আৰক্ষী চকীৰ ভিতৰত লক-আপ আদিৰ ম’বাইলেৰে ভিডিঅ’ ৰেকৰ্ডিং কৰা তথা আৰক্ষীৰ গাত হাত দিয়া বুলি এজাহাৰ দাখিল কৰিছিল।
কিন্তু পূৰ্বেও বিভিন্ন কুখ্যাতি আৰ্জি থোৱা জিলা আৰক্ষী অধীক্ষক অমিতাভ সিনহাই ঘটনাৰ আচল কাৰণ অনুসন্ধান নকৰাকৈয়ে জোৱান ইয়েনক শাস্তিমূলকভাৱে পুলিচ ৰিজৰ্ভলৈ বদলি কৰাৰ উপৰি প্ৰচণ্ড গৰমত ২১ আগষ্টৰ পৰা ২৬ আগষ্টলৈ বৰপুখুৰী আৰু আৰক্ষী অধীক্ষকৰ চোতালত দৌৰিবলৈ দিয়ে।
লগতে পঢ়ক জিম্মাত নিৰ্য্যাতন : গোৱালপাৰাৰ আৰক্ষী অধীক্ষকক দুবছৰৰ কাৰাদণ্ড কামৰূপ সত্ৰ ন্যায়াধীশৰ
ইয়েন পূৰ্বৰ পৰাই অসুস্থ আছিল আৰু এটা ভৰিত পূৰ্বে অপাৰেইশ্যন কৰা আছিল। তথাপি বিভাগীয় শাস্তি মূৰ পাতি লৈ দৌৰি থাকোতেই ইয়েন পৰি যায় আৰু পূৰ্বে আঘাত পাই থকা ভৰিত পুনৰ আঘাত পায়।
৫০ বছৰীয়া জোৱানজনে আৰক্ষী অধীক্ষকজনক এই শাস্তি সহিব পৰা অৱস্থাত নাই বুলি কোৱাৰ পাছতো আৰক্ষী অধীক্ষক সিনহাই ইয়েনক আকৌ ২৬ আগষ্টত মতাই আনি পুৱা ৫ বজাৰ পৰা ৬ বজালৈ বৰপুখুৰী পাৰত দৌৰিবলৈ দিয়ে। তাৰ পিছতো ১০ বজাৰ পৰা ১২ বজালৈ আৰক্ষী অধীক্ষকৰ কাৰ্যালয়ত দৌৰিবলৈ দিয়ে।
এই অত্যাচাৰৰ ফলত পৰামানন্দ ইয়েনৰ আঘাতপ্ৰাপ্ত ভৰিটো ফুলি যায় আৰু খোজ কাঢ়িব নোৱৰা হয়।
অসুস্থ হৈ পৰা ইয়েনক পৰিয়ালৰ লোকে ২৭ আগষ্টৰ ৰাতি আঠ মান বজাত শিৱসাগৰ অসামৰিক চিকিৎসালয়ত ভৰ্তি কৰে যদিও চিকিৎসাধীন অৱস্থাতে ৰাতি প্ৰায় ১২ মান বজাত জোৱানজনৰ মৃত্যু হয়।
পৰামানন্দ ইয়েনৰ পৰিয়াল আৰু তেওঁৰ পত্নী ফুলেশ্বৰী ইয়েনৰ স্পষ্ট অভিযোগ, আৰক্ষী অধীক্ষক অমিতাভ সিনহাই বিভাগীয় শাস্তিৰ নামত অত্যাচাৰ কৰা বাবেই তেওঁৰ মৃত্যু হৈছে।
পৰামানন্দ ইয়েনৰ আচল ঘৰ নিতাইপুখুৰীৰ চেঁচামুখ ভেকুৰী চাপৰি গাঁৱত। তেওঁ পত্নীৰ লগতে তিনিটা সন্তানক এৰি গৈছে।
উল্লেখ্য যে কুখ্যাত আৰক্ষী বিষয়া অমিতাভ সিনহা আৰক্ষীৰ জিম্মাত থকা অৱস্থাত অত্যাচাৰৰ ফলত এজন লোকৰ মৃত্যুৰ গোচৰ এটাত পূৰ্বেও দোষী সাব্যস্ত হৈছিল।
সিনহাৰ বিৰুদ্ধে ভাৰতীয় দণ্ডবিধিৰ ৩২৬ আৰু ৩৩১ ধাৰাত গোচৰ চলিছিল আৰু কামৰূপ মহানগৰ অতিৰিক্ত জিলা ন্যায়াধীশৰ আদালতে তেওঁক দোষী সাব্যস্ত কৰি ২০১৮ চনৰ ২১ জুনত দুবছৰৰ কাৰাদণ্ড আৰু ৫০ হাজাৰ টকাৰ জৰিমনা বিহিছিল।
উক্ত গোচৰটোৰ আৰক্ষীৰ জিম্মাত মৃত্যু হোৱা লোকজন আছিল হত্যাত অভিযুক্ত গুৰমিত সিং। জেৰাৰ সময়ত কৰা অত্যাচাৰৰ বাবে বশিষ্ঠ থানাত গুৰমিত সিঙৰ মৃত্যু হৈছিল। ২০১৩ চনৰ বশিষ্ঠ থানাৰ সেই জঘন্য ঘটনাটোত গুৰমিত সিঙক হকী ষ্টিকেৰে মৰিওৱা হৈছিল আৰু গুহ্যদ্বাৰত পেট্ৰল ঢালি দিয়া হৈছিল।
অমিতাভ সিনহা তেতিয়া গুৱাহাটীত অসম আৰক্ষীৰ অপৰাধ শাখাৰ অতিৰিক্ত আৰক্ষী অধীক্ষক হিচাপে কৰ্মৰত আছিল আৰু গুৰমিত সিঙক জেৰা চলাইছিল।
