অৰুণাচল প্ৰদেশৰ লংডিং জিলাৰ গিনু নামৰ ঠাইত পথৰ দাঁতিত এজন যুৱকৰ মৃতদেহ লগতে এখন মটৰ চাইকেল উদ্ধাৰ হোৱাক কেন্দ্ৰ কৰি সমগ্ৰ অঞ্চলটোত তীব্ৰ চাঞ্চল্যৰ সৃষ্টি হৈছে।
জানিব পৰা মতে, মঙলবাৰে নিশা প্ৰায় ৯.৩০ বজাত লংডিং আৰক্ষীয়ে মুৰত পিছফালে চোকা অস্ত্ৰৰ আঘাত স্পষ্ট হৈ থকা এটা মৃতদেহ পথৰ দাতিত উদ্ধাৰ কৰে।
প্ৰাথমিক তদন্তত মৃতদেহটো স্থানীয় গিনু গাঁৱৰ প্ৰয়াত পালাই পানচাৰৰ পুত্ৰ নওলাক পানচা (২৩) বুলি চিনাক্ত কৰণ কৰা হয়।
আনহাতে, মৃতদেহৰ কাষত আৰক্ষীয়ে এ এচ ১২-৮৬১৪ নম্বৰ এখন মটৰ চাইকেলো উদ্ধাৰ কৰে।
মটৰ চাইকেলখন মৃত নওলাক পানচাৰ বুলি জানিব পৰা গৈছে৷ বাইকত আহি থকা অৱস্থাতে দুৰ্বৃত্তই চোকা অস্ত্ৰৰে নওলাকক আক্ৰমণ কৰিছিল বুলি আৰক্ষীয়ে সন্দেহ প্ৰকাশ কৰিছে।
এইপৰ্যন্ত আৰক্ষীয়ে হত্যাকাণ্ডৰ প্ৰকৃত কাৰণ উদ্ধাৰ কৰিবলৈ সক্ষম হোৱা নাই যদিও ঘটনাৰ তদন্ত অব্যাহত ৰাখিছে।
