নগঁও লোকসভা সমষ্টিৰ টিকট বিচাৰি বিজেপিৰ দুই নেতা ৰাজেন গোহাঁই আৰু ৰূপক শৰ্মাৰ মাজত তুমুল প্ৰতিদ্বন্দ্বিতা চলাৰ পাছত এইবাৰে নগাঁও ক্ৰীড়া সন্থাৰ সভাপতি পদৰ বাবে দুয়োগৰাকী নেতাৰ মাজত প্ৰতিদ্বন্দ্বিতা হোৱাৰ সম্ভাৱনাই দেখা দিছে।
ইতিমধ্যে ক্ৰীড়া সন্থাৰ সভাপতি পদৰ বাবে বুধবাৰে নগাঁও বিধানসভা সমষ্টিৰ বিধায়ক ৰূপক শৰ্মাই আৰু বৃহস্পতিবাৰে ৰাজেন গোহাঁয়ে মনোনয়ন পত্ৰ দাখিল কৰে।
উল্লেখযোগ্য যে, ২০১৭ বৰ্ষত নগাঁও ক্ৰীড়া সন্থাৰ সভাপতি পদৰ পৰ ৰকিবুল হুছেইনে পদত্যাগ কৰাৰ পাছত তেতিয়াৰে পৰা সভাপতি পদত অধিষ্ঠি হৈ আছিল ৰাজেন গোহাঁয়।
আনহাতে, ৰূপক শৰ্মাই সন্থাৰ উপ-সভাপতি হিচাপে কাৰ্য্য নিৰ্বাহ কৰি আছিল।
নগাঁও ক্ৰীড়া সন্থাৰ নতুন সমিতি গঠনৰ বাবে ১ ছেপ্তেম্বৰত নিৰ্বাচন অনুষ্ঠিত কৰা হ’ব।
নগাঁও ক্ৰীড়া সন্থাৰ সভাপতি পদৰ বাবে মনোনয়ন পত্ৰ দাখিল কৰাৰ পাছত দুয়োগৰাকী প্ৰভাৱশালী নেতাই সংবাদ মাধ্যমৰ আগত ভিন্ন ধৰণে নিজৰ নিজৰ মতামত দাঙি ধৰে।
লোকসভা নিৰ্বাচনৰ সময়ৰ পৰা ৰূপক শৰ্মা আৰু ৰাজেন গোহাঁইৰ মাজত চলি থকা প্ৰতিদ্বন্দ্বিতাখনে ১ ছেপ্তম্বৰৰ পূৰ্বে আৰু অধিক গতি লাভ কৰিব বুলি সৰ্বত্ৰে চৰ্চা লাভ কৰিছে।
