ভাৰতৰ প্ৰয়াত প্ৰাক্তন ৰাষ্ট্ৰপতি ফখৰুদ্দিন আলী আহমেদৰ পৰিয়ালৰ নাম নাহিল এন আৰ চিৰ চূড়ান্ত তালিকাত।
ফখৰুদ্দিন আলী আহমেদ ১৯৭৪ চনৰ পৰা ১৯৭৭ চনলৈকে ভাৰতৰ পঞ্চমগৰাকী ৰাষ্ট্ৰপতি হিচাপে কাৰ্যনিৰ্বাহ কৰিছিল।
শনিবাৰে প্ৰকাশ পোৱা এন আৰ চিৰ চূড়ান্ত তালিকাত ফখৰুদ্দিন আলী আহমেদৰ ভাতৃৰ পুত্ৰৰ পৰিয়ালৰ নাম নাহিল।
তেওঁলোকৰ নাম যোৱা জুলাই মাহত প্ৰকাশ পোৱা এন আৰ চিৰ খচৰাতো প্ৰকাশ পোৱা নাছিল।
‘’ মই প্ৰাক্তন ৰাষ্ট্ৰপতি ফখৰুদ্দিন আলী আহমেদৰ ভতিজা আৰু মোৰ দেউতাৰ নাম লিগেচী ডাটাত নথকাৰ বাবে মোৰ নাম এন আৰ চিৰ তালিকাত নাহিল। আমি ইয়াক লৈ কিছু চিন্তিত,’’-জিয়াউদ্দিন আহমেদে সংবাদ মাধ্যমৰ আগত এইদৰে কয়।
শনিবাৰে প্ৰকাশ পোৱা এন আৰ চিৰ চূড়ান্ত তালিকাৰ পৰা ১৯,০৬,৬৫৭গৰাকী লোকৰ নাম বাদ পৰিছে।
আনহাতে, ভাৰতীয় নাগৰিকৰ তালিকাত নাম সন্নিৱিষ্ট হৈছে ৩,১১,২১ ০০৪গৰাকী লোকৰ নাম।
কেন্দ্ৰীয় গৃহ মন্ত্ৰালয়ৰ মতে, বাদ পৰা ১৯,০৬,৬৫৭গৰাকী লোকে তেওঁলোকৰ দাবী দাখিল কৰা নাছিল।
শনিবাৰে এন আৰ চিৰ চূড়ান্ত তালিকা প্ৰকাশ পোৱাৰ পাছৰে পৰা অসমৰ লগতে সমগ্ৰ দেশতে ইয়াক লৈ চৰ্চা অব্যাহত আছে।
