শিৱসাগৰ জিলা ৰাষ্ট্ৰীয় স্বাস্থ্য মিছনৰ প্ৰগ্ৰেম মেনেজাৰক শনিবাৰে শিৱসাগৰ আৰক্ষীয়ে চৰকাৰী আৱাসৰ পৰা আটক কৰা ঘটনাই ব্যাপক চাঞ্চল্যৰ সৃষ্টি কৰিছে।
ৰাষ্ট্ৰীয় স্বাস্থ্য মিছনৰ শিৱসাগৰ জিলাৰ প্ৰগ্ৰেম, মেনেজাৰ হিল্টন শইকীয়াৰ বিৰুদ্ধে একেটা বিভাগৰে লেবৰটৰী টেকনিচিয়ানে প্ৰেমৰ ভুৱা নাটক কৰি প্ৰৱঞ্চনাৰে ধৰ্ষণ কৰাৰ অভিযোগ তুলি শুকুৰবাৰে শিৱসাগৰ আৰক্ষী থানাত গোচৰ তৰিছিল।
উক্ত গোচৰৰ ভিত্তিত শিৱসাগৰ আৰক্ষীয়ে শনিবাৰে হিল্টন শইকীয়াক আটক কৰে।
জানিব পৰা মতে পূৰ্বে বিবাহিত হিল্টন শইকীয়াই কিছু বছৰ পূৰ্বে নিজ পত্নীৰ পৰা আঁতৰি একে বিভাগতে কৰ্মৰত লেবৰটৰী টেকনিচিয়ান বৰ্ণালী দেউৰীৰ লগত অবৈধ প্ৰেমত পৰে আৰু বৰ্ণালী দেউৰীক বিয়া কৰোৱাৰ প্ৰতিশ্ৰুতিৰে শাৰিৰীক সম্পৰ্কত লিপ্ত হয়।
দীৰ্ঘদিন দুয়োৰে মাজত থকা সম্পৰ্কৰ পাছত হিল্টল শইকীয়াই লাহে লাহে বৰ্ণালী দেউৰীৰ পৰা আঁতৰি আহিবলৈ চেষ্টা কৰে আৰু পূৰ্বে দিয়া বিয়াৰ প্ৰতিশ্ৰুতি পাহৰি দুয়োৰে জাত বেলেগ হোৱাৰ বাবে বিয়া পাতিব নোৱাৰে বুলি কয়।
হিল্টনৰ ভূৱা প্ৰেমত পতিয়ণ গৈ নিজৰ সৰ্বোচ্চ ত্যাগ কৰা বৰ্ণালী দেউৰীয়ে অৱশেষত কাষ চাপে আৰক্ষীৰ।
হিল্টন শইকীয়াই প্ৰৱঞ্চনাৰে তেওঁক ধৰ্ষণ কৰাৰ গুৰুতৰ অভিযোগ তুলি শিৱসাগৰ আৰক্ষী থানাত গোচৰ ৰুজু কৰে।
আৰক্ষীয়ে মহিলাগৰাকীৰ গোচৰৰ ভিত্তিত মহিলাগৰাকীৰ স্বাস্থ্য পৰীক্ষা কৰে আৰু শনিবাৰে হিল্টন শইকীয়াক শিৱসাগৰৰ স্বাস্থ্য বিভাগৰ চৰকাৰী আৱাসৰ পৰা আটক কৰে।
বৰ্ণালী দেউৰীৰ এজাহাৰৰ ভিত্তিত আৰক্ষীয়ে ভাৰতীয় দণ্ডাবিধি আইনৰ অধীনত ৪৯৮(এ)৩৭৬, ৪৯৪ ধাৰাত ৯১৩/১৯ নম্বৰৰ গোচৰ ৰুজু কৰি হিল্টনক গ্ৰেপ্তাৰ কৰে।
নিশালৈ স্বাস্থ্য পৰীক্ষা কৰাৰ লগতে হিল্টন শইকীয়াৰ জেৰা অব্যাহত ৰাখিছে শিৱসাগৰ আৰক্ষীয়ে।
ইপিনে, হিল্টন শইকীয়াৰ প্ৰথমা পত্নীয়ে বৰ্ণালী দেউৰীৰ বিৰুদ্ধে ৰুজু কৰিছে ব্লেকমেইলিঙৰ গোচৰ।
এজাহাৰত তেওঁ বৰ্ণালী দেউৰীয়ে দীৰ্ঘদিন ধৰি হিল্টন শইকীয়াৰ পৰা ধন, আ-অলংকাৰ দাবী কৰাৰ লগতে তেওঁলোকৰ সংসাৰ ভঙাৰ অভিযোগ আনি এক গোচৰ ৰুজু কৰে।
হিল্টন শইকীয়াৰ পত্নীৰ হিয়াভৰা কান্দোনত শিৱসাগৰ সদৰ থানাত হাহাকাৰ পৰিস্থিতিৰ সৃষ্টি হয়।
এক সুত্ৰৰ পৰা জানিব পৰা মতে হিল্টন শইকীয়া আৰু বৰ্ণালী দেউৰীৰ মাজৰ বহু অন্তৰংগ মুহূৰ্তৰ ফটো, টেলিফোনিক বৰ্তালাপৰ ৰেকৰ্ডিং বৰ্ণালী দেউৰীয়ে আৰক্ষীক জমা দিয়া বুলি জানিব পৰা গৈছে।
শিৱসাগৰ যুটীয়া স্বাস্থ্য বিভাগৰ শীৰ্ষ কৰ্মচাৰীৰ দ্বাৰা সংঘটিত এনে নিৰ্লজ কাণ্ডত তীব্ৰ প্ৰতিক্ৰিয়াৰ সৃষ্টি হৈছে।
