উত্তৰ-পূব পৰিষদে (এন ই চি) উত্তৰ-পূবৰ দুৰ্গম অঞ্চলত জীৱন দায়িনী ঔষদ সমূহ দ্ৰোণৰ মাধ্যমেৰে যোগান ধৰাৰ পৰিকল্পনা গ্ৰহণ কৰিছে।
শ্বিলঙত অনুষ্ঠিত হোৱা এখন স্বাস্থ্য সম্পৰ্কীয় বৈঠকত অংশগ্ৰহণ কৰি উত্তৰ-পূব পৰিষদৰ পৰিকল্পনা উপদেষ্টা কেলভিন কে খৰছিঙে প্ৰথমে পৰীক্ষামূলক ভাৱে শ্বিলঙত দ্ৰোণেৰে ঔষধ যোগান ধৰা হ’ব বুলি উল্লেখ কৰে।
তেওঁ লগতে এই প্ৰকল্পৰ বাবে কেন্দ্ৰই প্ৰাথমিক পৰ্য্যায়ত ১০ লাখ টকা মুকলি কৰি দিছে বুলি জনায়।
উত্তৰ-পূবৰ দুৰ্গম অঞ্চলসমূহ য’ত প্ৰয়োজনীয় স্বাস্থ্য সুবিধা উপলব্ধ নহয় সেই অঞ্চলসমূহত দ্ৰোণেৰে জীৱন দায়িনী ঔষধ সমূহ যোগান ধৰাতো যথেষ্ট ফলপ্ৰসু হিচাপে বিবেচিত হ’ব বুলিও খৰছিঙে কয়।
আনহাতে, সমগ্ৰ প্ৰকল্পটোত স্থানীয় নাগৰিক সকল জড়িত হৈ থাকিব বুলি উল্লেখ কৰি খৰছিঙে দুৰ্যোগৰ সময়ত এইসকল লোকে যথেষ্ট সহায় কৰি আহিছে বুলি কয়।
উল্লেখযোগ্য যে, এন ই চি আৰু য়ুনিচেফৰ উদ্যোগত আৰু অক্সফাম ইণ্ডিয়াৰ সহযোগত বৈঠকখন অনুষ্ঠিত হৈছিল।
উত্তৰ-পূবৰ জনসাধাৰণক জৰুৰী সময়ত নতুন উপায়েৰে প্ৰয়োজনীয় স্বাস্থ্য সেৱা আগবঢ়োৱাৰ বাবে বৈঠকখন অনুষ্ঠিত কৰা হৈছিল।
