অসম মানৱ অধিকাৰ আয়োগে “চিকিৎসা অৱহেলা”ত ৰোগীৰ মৃত্যুৰ বাবে গুৱাহাটীৰ চিকিৎসক এজনক জগৰীয়া কৰি ক্ষতিপূৰণ আদায়ৰ নিৰ্দেশ দিছে।
ঘনশ্যাম ঠাকুৰীয়া নামৰ চিকিৎসকজনক দায়ী কৰা হৈছে। আৰু মৃত ৰোগী পিংকী দাসৰ পৰিয়ালক ৫ লাখ টকা ক্ষতিপূৰণ দিবলৈ আয়োগে নিৰ্দেশ দিছে।
ঠাকুৰীয়াৰ অধীনত চিকিৎসাধীন দাসৰ মৃত্যুৰ বাবে “চিকিৎসাত অৱহেলা”ত জগৰীয়া কৰা হৈছে চিকিৎসকজনক।
আয়োগৰ অধ্যক্ষ ন্যায়াধীশ টি ভাইপেইকে ধৰি সম্পূৰ্ণ বিচাৰপীঠে চিকিৎসকজনক দোষী বুলি ৰায় দিছে।
মৃত দাসৰ গিৰীয়েক কমল দাসৰ অভিযোগত উল্লেখ, চিকিৎসকজনৰ পৰামৰ্শমতে বেজি আৰু চেলাইন দিয়াৰ ক্ষন্তেক পিছতে ৰোগী পিংকী দাসৰ মৃত্যু হৈছিল।
অভিযোগমতে, ৰোগীগৰাকীয়ে কঁকালৰ বিষ, সামান্য জ্বৰ, তলপেটৰ বিষ আৰু জ্বলা-পোৰাৰ চিকিৎসা কৰিবলৈ বাবে চিকিৎসকজনৰ কাষ চাপিছিল।
ঠাকুৰীয়া অসম চৰকাৰৰ অধীন আমবাৰী আৰ্বান হেল্থ চেণ্টাৰৰ চিকিৎসক হোৱা বাবে আয়োগে দুমাহৰ ভিতৰত চৰকাৰক এই ক্ষতিপূৰণ আদায় দিয়াৰ নিৰ্দেশ দিছে।
আয়োগৰ মতে, ঘটনাটো সন্দৰ্ভত অসম চৰকাৰৰ স্বাস্থ্য আৰু পৰিয়াল কল্যাণ বিভাগৰ সঞ্চালকৰ পৰা “ব্যাখ্যা” (explanation) বিচৰা হৈছিল।
কিন্তু, সঞ্চালকে কোনো সঁহাৰি নজনোৱাত “বিকল্প”হীন আয়োগে চিকিৎসকজনক জগৰীয়া কৰি চৰকাৰক এই ক্ষতিপূৰণ প্ৰদানৰ নিৰ্দেশ দিছে।
“উল্লেখিত ধনখিনি তেওঁৰ হৈ আৰু তেওঁৰ দৰমহাৰ পৰা কিস্তি হিচাপে আদায় বা আন উপায়েৰে পৰিশোধ জগৰীয়া চিকিৎসকজনৰ নিয়োগকৰ্তা হিচাপে ৰাজ্য চৰকাৰৰ বাবে মুকলি ৰখা হৈছে,” আয়োগৰ নিৰ্দেশটোত কোৱা হৈছে।
ৰোগীৰ মৃত্যুৰ পিছতে অভিভাৱক কমল দাসে ২০১৭ চনৰ ১৩ অক্তোবৰত আয়োগৰ কাষ চাপিছিল।
