ৰাষ্ট্ৰসংঘৰ শৰণাৰ্থী উচ্চায়ুক্তই এটা বিবৃতিত অসমৰ এন আৰ চিৰ প্ৰেক্ষাপটত ৰাষ্ট্ৰহীন হৈ পৰিব পৰা মানুহৰ সমস্যাটো অতি শীঘ্ৰে সমাধান কৰিবলৈ আহ্বান জনাইছে।
বিশ্বৰ বিভিন্ন অংশত নাগৰিকত্বহীনতা বা ৰাষ্ট্ৰহীনতাৰ শংকাত থকা লোকসকলৰ কথা ক’বলৈ গৈ বিশেষভাৱে ম্যানমাৰৰ ৰহিঙীয়াসকল আৰু অসমত সংখ্যালঘু জনসমষ্টিৰ ৰাষ্ট্ৰহীনতাৰ শংকাৰ কথাটো উল্লেখ কৰে।
“সমাধান জৰুৰীভাৱে প্ৰয়োজন হৈছে” বুলি মন্তব্য কৰি বিশ্বৰ শৰণাৰ্থী সমস্যাটোত চকু ৰখা ৰাষ্ট্ৰসংঘৰ গোটটোৰ উচ্চায়ুক্ত ফিলিপো গ্ৰাণ্ডিয়ে কয়, “ইয়াৰ অন্যথাই আমি ইতিপূৰ্বে লাখ লাখ লোক ভুক্তভোগী হোৱা এই বহিৰ্ভূতকৰণক অধিক গভীৰ কৰা হ’ব”।
৭-ৰ পৰা ১১ অক্টোবৰলৈ জেনেভাত কাৰ্য্যকৰী কমিটীৰ বাৰ্ষিক অধিৱেশন অনুষ্ঠিত হ’ব আৰু তাৰ কেইঘণ্টামান পূৰ্বে তেওঁ এই গুৰুত্বপূৰ্ণ বিবৃতি আগ বঢ়ায়।
গ্ৰাণ্ডিয়ে শেহতীয়াকৈ উত্থান ঘটা ৰাষ্ট্ৰবাদৰ ভয়ংকৰ ৰূপটোক আঙুলিয়াই ই “ৰাষ্ট্ৰহীনতা”ৰ বিৰুদ্ধে চলাই থকা যুঁজখনৰ শেহতীয়া অগ্ৰগতিক বিপৰ্য্যয়ৰ মাজলৈ ঠেলি দিয়া বুলি সোঁৱৰাই দিয়ে। তেওঁ ৰাষ্ট্ৰহীনতাক বিশ্বজুৰি লাখ লাখ মানুহৰ দুৰ্ভোগৰ এটা কাৰণ বুলি কয়।
বিশ্ব সম্প্ৰদায় এতিয়া ৰাষ্ট্ৰহীনতাক চিৰ বিদায় দিবলৈ আগ বাঢ়ি আহিছে বুলি দাবী কৰি ইয়াৰ বাধা হিচাপে ৰাষ্ট্ৰবাদক চিহ্নিত কৰে।
“যদিও আশাকৰা ধৰণে অগ্ৰগতি হোৱা নাই, ৰাষ্ট্ৰবাদৰ বিভিন্ন ধ্বংসাত্মক ৰূপবোৰ আৰু শৰণাৰ্থী তথা প্ৰব্ৰজন-বিৰোধী ভাবাৱেগবোৰ হ’ল এই অগ্ৰগতিক পিছলৈ ঠেলা শক্তিশালী আন্তঃৰাষ্ট্ৰীয় ঢৌ”, বিবৃতিটোত গ্ৰাণ্ডিয়ে কয়।
ৰাষ্ট্ৰসংঘৰ এই শৰণাৰ্থী এজেন্সিটোৱে ২০১৪ চনত “IBelong” হেছটেগৰ অধীনত ২০২৪ চনৰ ভিতৰত নাগৰিকত্বহীনতা নোহোৱা কৰা বাবে এটা অভিযান আৰম্ভ কৰিছিল।
তেতিয়াৰ পৰা প্ৰায় ১৫খন দেশে নাগৰিকত্বহীনতাৰ দুখন প্ৰধান চুক্তি (the 1954 UN Convention relating to the Status of Stateless Persons আৰু the 1961 Convention on the Reduction of Statelessness)ত সন্মতি প্ৰদান কৰিছে।
এই সপ্তাহত এই সন্মতি প্ৰদানৰ সংখ্যা অধিক বৃদ্ধি পাব বুলি গ্ৰাণ্ডিয়ে আশা প্ৰকাশ কৰে। the 1954 UN Convention relating to the Status of Stateless Persons চুক্তিখনত সন্মতি জনোৱা দেশৰ সংখ্যাই ১০০খনৰ সীমা অতিক্ৰম কৰিব পাৰে বুলি তেওঁৰ মন্তব্য।
বিবৃতিটোত গুৰুত্বপূৰ্ণ তথ্য দাঙি ধৰি গ্ৰাণ্ডিয়ে কয়, প্ৰথম পাঁচ বছৰত ২,২০,০০০জনতকৈ অধিক লোকে নাগৰিকত্ব লাভ কৰিছে।
এই বছৰৰ জুলাইত কিৰ্গিস্তান বিশ্বৰ প্ৰথমখন এনে দেশত পৰিণত হয়, যি নাগৰিকত্বহীনতাৰ সকলো জ্ঞাত ঘটনাৰ সম্পূৰ্ণ সমাধান ঘোষণা কৰে।
তাৰোপৰি, অভিযানটো আৰম্ভ হোৱাৰ পিছৰ পৰা দুখন দেশ- মাদাগাস্কা আৰু ছিয়েৰা লিয়নে নাগৰিকত্ব আইন সংশোধন কৰিছে। এই সংশোধনৰ জৰিয়তে মাতৃসকলেও দেউতাকসকলৰ দৰেই তেওঁলোকৰ সন্তানলৈ নাগৰিকত্ব হস্তান্তৰ কৰিব পাৰিব। অৰ্থাৎ মাতৃৰ সূত্ৰৰ পৰাও সন্তানে নাগৰিকত্ব লাভ কৰিব পাৰিব।
বিশ্বত এতিয়াও ২৫খন দেশে মাতৃৰ সূত্ৰৰ পৰা সন্তানে নাগৰিকত্ব লাভ কৰাৰ নিয়মক অনুমতি দিয়া নাই।
বিবৃতিটোত আৰু কোৱা হয় যে সকলো নাগৰিকত্ব আইনে কোনো শিশু যাতে নাগৰিকত্ববিহীন হৈ জন্ম নহয়, নাগৰিকত্বহীনতা যে প্ৰজন্মৰ পিছত প্ৰজন্মলৈ বাগৰি গৈ থাকিব পাৰে সেইবোৰ নিশ্চিত নকৰে।
উল্লেখ কৰিব পাৰি যে অসমত সদ্যপ্ৰকাশিত এন আৰ চিৰ পৰা ১৯লাখতকৈ অধিক লোকৰ নাম বাদ পৰিছে, যিটোক লৈ বিভিন্ন মানৱ অধিকাৰ সংগঠন, ৰাষ্ট্ৰসংঘৰ দৰে আন্তঃৰাষ্ট্ৰীয় সংস্থাই উদ্বেগেৰে চকু ৰাখিছে।
