ভাৰতীয় সেনাই অৰুণাচল প্ৰদেশত সংস্থাপন কৰিব এমেৰিকান সৈন্যই আফগান, ইৰাক যুদ্ধত ব্যৱহাৰ কৰা এম ৭৭৭ হাৱিটচাৰ কামান।
সেনা সূত্ৰমতে, অসমৰ চুবুৰীয়া ৰাজ্যখনৰ টাৱাং, কামেং আৰু ৱালঙত চুটি নলীৰ পাতল কামানবিধ খুব সোনকালেই সংস্থাপিত কৰা হ’ব।
খবৰ মতে, অৰুণাচল প্ৰদেশস্থিত ভাৰতীয় সেনাৰ আৰ্টিলাৰি সৈন্যক এম ৭৭৭ পৰিচালনাৰ প্ৰশিক্ষণ প্ৰদান কৰি থকা হৈছে।
অৰুণাচল প্ৰদেশৰ লগতে চীন সীমান্তৰ লাডাখতো মুঠ ১৪৫টা হাৱিটচাৰ সংস্থাপন কৰাৰ সিদ্ধান্ত গ্ৰহণ কৰা হৈছে, সূত্ৰটোৱে জনায়।
ভাৰতীয় সেনাৰ প্ৰায় ৭টা ৰেজিমেণ্টৰ অধীনত এই কামানসমূহ পৰিচালিত হ’ব।
ভাৰতৰ সীমান্তসমূহত পূৰ্বৰ পৰা ব’ফ’ৰ্চ কামান ব্যৱহাৰ হৈ আহিছে যদিও পাতল হোৱা বাবে দুৰ্গম এলেকাসমূহলৈ হাৱিটচাৰ পৰিবহণ অধিক সহজ।
“লাইন আৱ এক্সুৱেল কন্ত্ৰ’ললৈ হাৱিটচাৰসমূহ বিমানেৰে পৰিবহণ কৰিব পাৰি। পথ যোগাযোগত অসুবিধাজনক পাহাৰীয়া অৰুণাচল প্ৰদেশৰ পূব সীমান্তত ই সহায়ক হ’ব,” সূত্ৰটোৱে কয়।
হাৱিটচাৰসমূহ চিনুক হেলিকপ্তাৰৰ জৰিয়তেই অৰুণাচল প্ৰদেশৰ এদভান্সদ লান্দিং গ্ৰাউন্দসমূহলৈ কঢ়িয়াই নিব পৰা যাব।
সূত্ৰটোৱে জনোৱা মতে, পৰিবহণৰ সুবিধাৰ বাবে অসমৰ দিনজান এলেকাত চিনুক ইউনিট এটাও স্থাপন কৰা হ’ব।
ভাৰতীয় বায়ু সেনাই যোৱা ১৮ ছেপ্তেম্বৰত অৰুণাচল প্ৰদেশৰ ম্যানমাৰ (আনফালে চীন) সীমান্তত বিজয়নগৰ এদভান্সদ লেণ্ডিং গ্ৰাউণ্ড পুনৰ সক্ৰিয় কৰিছে।
অৰুণাচল প্ৰদেশত ভাৰতীয় সেনাৰ চলোৱা এতিয়ালৈকে সৰ্ববৃহৎ মাউণ্টেইন ষ্ট্ৰাইক অনুশীলন “হিমবিজয়”ক লৈ চীনে শেহতীয়াকৈ আপত্তি কৰা বুলি বাতৰিত প্ৰকাশ।
চীনা ৰাষ্ট্ৰপতি চি জিনপিং অহা সপ্তাহত ভাৰত ভ্ৰমণলৈ অহাৰ কথা।
