চুবুৰীয়া দেশ ম্যানমাৰৰ আগ শাৰীৰ উচ্চ শিক্ষাৰ প্ৰতিষ্ঠান য়াংগোন বিশ্ববিদ্যালয়ত হিন্দী ভাষা শিক্ষাৰ পাঠদানৰ শুভাৰম্ভ কৰা হৈছে।
বিশ্ববিদ্যালয়খনৰ বিদেশী ভাষা শিক্ষাৰ বিভাগত এই বহু প্ৰতীক্ষিত হিন্দী পাঠদানৰ আনুষ্ঠানিক সূচনা হয় আৰু শিক্ষাৰ্থীসকলে উৎসাহপূৰ্বক অংশগ্ৰহণ কৰিছে, ইণ্ডিয়া ইন ম্যানমাৰ নামৰ টুইটাৰ একাউণ্টটোৱে এই খবৰ দি কয়।
ইণ্ডিয়া ইন ম্যানমাৰ চুবুৰীয়া দেশখনত থকা কনছুলেটৰ জেনেৰেল অব ইণ্ডিয়াৰ অফিচিয়েল টুইটাৰ হেণ্ডেল।
ম্যানমাৰত যথেষ্ট সংখ্যক ভাৰতীয় মানুহে বাস কৰে আৰু তেওঁলোককো এই নতুন আৰম্ভণিটোৱে উৎসাহিত কৰাৰ সম্ভাৱনা আছে।
টুইটটোত দুখন ফটোও দিয়া হৈছে, য’ত ম্যানমাৰৰ থলুৱা শিক্ষাৰ্থীক শ্ৰেণীত উপস্থিত থকা দেখা গৈছে।
ভাৰতত হিন্দী এটা প্ৰধান ভাষা আৰু ই দেশখনৰ প্ৰধান দুটা চৰকাৰী ভাষাৰ এটা (আনটো ইংৰাজী)।
ভাৰতৰ বিদ্যালয় আৰু মহাবিদ্যালয়বোৰতো বহুকেইটা বিদেশী ভাষাৰ শিক্ষা দিয়া হয়, যাৰ মাজত ফৰাচী আৰু জাৰ্মানী সৰ্বাধিক ভাৰতীয় লোকে শিকা বিদেশী ভাষা।
