বিজেপি দলৰ নাগালেণ্ডৰ নিৰ্বাচনী দায়িত্বত থকা কেন্দ্ৰীয় গৃহ ৰাজ্য মন্ত্ৰী কিৰেন ৰিজিজু আৰু নেশ্যনেলিষ্ট ডেমক্ৰেটিক প্ৰগ্ৰেছিভ পাৰ্টিৰ মুখ্য মন্ত্ৰী পদৰ প্ৰাৰ্থী নেইফিউ ৰিঅ’ৱে আজি গুৱাহাটীত প্ৰাক-নিৰ্বাচনী মিত্ৰতাৰ কথা ঘোষণা কৰে। আনহাতে বিজেপিৰ কেন্দ্ৰীয় কমিটিয়ে অহা ২৭ জানুৱাৰিত হ’ব লগীয়া ত্ৰয়োদশ নাগালেণ্ড বিধানসভাৰ বাবে দলৰ ২০ জন সদস্যৰ তালিকা ঘোষণা কৰিছে।
এন ডি পি পিৰ নেতা তথা লোকসভাৰ সাংসদ নেইফিউ ৰিঅ’ আৰু নাগালেণ্ড বিজেপিৰ সভাপতি ভিছাছ’লি লৌংগু, এন ডি পি পিৰ সাধাৰণ সম্পাদক ৰুছেমটং লংকুমাৰ আৰু নাগালেণ্ড বিজেপিৰ নিৰ্বাচনী প্ৰচাৰ সমিতিৰ আহ্বায়ক ড০ এম চুবা আওৱে কয় যে বিজেপি আৰু এন ডি পি পিয়ে আগন্তুক নাগালেণ্ড বিধানসভা নিৰ্বাচনৰ বাবে প্ৰাক নিৰ্বাচনী মিত্ৰতাত উপনীত হৈছে। ইয়াৰ বাবে দুয়োটা দলৰ মাজত আসনৰ বিতৰণো হৈছে। এই বুজাবুজি চুক্তি মৰ্মে ৬০ জনীয়া বিধানসভা নিৰ্বাচনত এন ডি পি পিয়ে ৪০খন আসনত আৰু বিজেপিয়ে ২০ খন আসনত প্ৰাৰ্থী দিব।
আনহাতে জানিব পৰামতে বিজেপিয়ে এগৰাকী মহিলাক প্ৰাৰ্থিত্ব দিছে। তেওঁৰ নাম হ’ল ৰাখিলা আৰু তেওঁ টুৱেনচাং সদৰ ২ বিধানসভা সমষ্টিৰ পৰা প্ৰতিদ্বন্দ্বিতা কৰিব। তেওঁ যোৱা বিধানসভা নিৰ্বাচনতো বিজেপিৰ টিকটৰ পৰা প্ৰতিদ্বন্দ্বিতা কৰি পৰাজিত হৈছিল।
শনিবাৰে ঘোষিত বিজেপিৰ প্ৰাৰ্থীসকলৰ সদস্যসকলৰ নাম আৰু তেওঁলোকে প্ৰতিদ্বন্দ্বিতা কৰিব লগীয়া সমষ্টিবোৰ হ’ল : Tovihoto Ayemi (1 A/C Dimapur 1), N Jacob Zhimomi (4 A/C Ghaspani 1), Dr Sukhato A Sema (13 A/C Pughoboto), Kevechutso (I7 A/C Chizami), Dr Longriniken (29 A/C Jangpetkong), lmna Along (30 A/C Alongtaki), Kazheto (31 A/C Akuluto), KL Chishi (32 A/C Atoizu), Kehovi (33 A/C Suruhoto), Y Patton (37 A/C Tyui), Dr TM Lotha (38 A/C Wokha), Mmhonlumo Kikon (40 A/C Bhandari), P Paiwang Konyak (41 A/C Tizit), C Kawang Konyak (45 A/C Tehok), Pangyu Phom (50 A/C Longleng), Imtilemba (52 A/C Longkhim Chare), Rakhila (54 A/C Tuensang Sadar II), Haiying (56 A/C Noklak), Kashiho Sangtam (59 A/C Seyochung Sitimi) আৰু Yankiu Yimchunger (60 A/C Pungro).
উল্লেখযোগ্য যে বিজেপি-এন ডি পি পিৰ মিত্ৰতা শাসনাধিষ্ঠিত এন পি এফৰ বাবে এটা বিপৰ্য্যয়ৰ দৰে গণ্য কৰিব পাৰি। কিয়নো এন পি এফেও গেৰুৱা দলটোৰ সৈতে মিত্ৰতাৰ চেষ্টা কৰি আছিল। বিজেপিয়েও কিছু দিনৰ আগলৈকে দলটোৰ সৈতে মিত্ৰতাৰ ইংগিত দি আছিল।
আনকি নাগালেণ্ডৰ মুখ্য মন্ত্ৰী টি আৰ জেলিয়াঙে কিছু দিনৰ আগতে বিজেপিৰ ৰাষ্ট্ৰীয় সভাপতি অমিত শ্বাহৰ সৈতে এখন বৈঠকত মিলিত হোৱাৰ পিছত দল দুটাৰ মিত্ৰতা আৰু আসন ভাগ বটোৱাৰাৰ সম্ভাৱনাৰ কথা ৰাজহুৱা কৰিছিল।
