অসমৰ সীমান্তত থকা চুবুৰীয়া ৰাষ্ট্ৰ বাংলাদেশত আলফা (স্বা)ৰ স্থিতি পুনৰ প্ৰকাশ পাইছে শেহতীয়াকৈ উদ্ধাৰ হোৱা মাৰণাস্ত্ৰৰ ভাণ্ডাৰৰ পৰা।
দেশখনৰ ত্ৰিপুৰা সীমান্তৱৰ্তী বনাঞ্চলত অত্যাধুনিক মাৰণাস্ত্ৰৰ ভাণ্ডাৰ উদ্ধাৰ হোৱাৰ ঘটনাই পুনৰ দেশখনত আলফাৰ স্থিতি ঠন ধৰি উঠাৰ ইংগিত বহন কৰিছে।
বাংলাদেশৰ ভূখণ্ডত আলফাৰ ঘাটিসমূহ সম্পূৰ্ণৰূপে ধ্বংস কৰা বুলি দেশখনৰ চোৰাংচোৱা তথা নিৰাপত্তা বাহিনীসমূহে দাবী কৰি অহাৰ সময়তে এনেধৰণে বিশাল অস্ত্ৰ ভাণ্ডাৰ উদ্ধাৰৰ ঘটনাই স্বাভাৱিকতে চাঞ্চল্যৰ সৃষ্টি কৰিছে।
দেশখনৰ চৰকাৰ অথবা নিৰাপত্তা বাহিনীয়ে এতিয়াও এই সম্পৰ্কত কোনো তথ্য সদৰি কৰা নাই যদিও বনাঞ্চলৰ এটা বাংকাৰত উদ্ধাৰ হোৱা টেংক বিধ্বংসী ৰকেটকে ধৰি মাৰণাস্ত্ৰৰ ভাণ্ডাৰ আলফাৰে হ’ব বুলি সন্দেহ কৰা হৈছে।
চুবুৰীয়া দেশখনৰ বনাঞ্চলত ঘাটি পাতি এনেধৰণে মাৰণাস্ত্ৰৰ ভাণ্ডাৰ গঢ়ি তুলি তাৰ পৰাই কূটাঘাতমূলক কাৰ্য সংঘটিত কৰাৰ পৰিকল্পনা কৰা বুলি ধাৰণা কৰা হৈছে।
সংবাদ প্ৰতিষ্ঠানৰ বাতৰি অনুসৰি চুবুৰীয়া বাংলাদেশৰ চুনাৰঘাট উপ-জিলাৰ অন্তৰ্গত হাবিগঞ্জৰ সাতচাৰি ৰাষ্ট্ৰীয় উদ্যানত অভিযান চলাই ৰেপিড একশ্যন বেটেলিয়নে এই অস্ত্ৰ ভাণ্ডাৰ উদ্ধাৰ কৰে।
বাহিনীটোৰ শীৰ্ষ বিষয়াগৰাকীয়ে সাংবাদিকক জনোৱা মতে তেওঁলোকে যোৱা শুকুৰবাৰৰ সন্ধিয়াৰ পৰা শনিবাৰৰ আৱেলিলৈকে ৰাষ্ট্ৰীয় উদ্যানখনত ব্যাপক অভিযান চলায়।
এই অভিযানত বনাঞ্চলৰ এক দুৰ্গম স্থানত থকা এটা বাংকাৰৰ পৰা ১০ টা টেংক বিধ্বংসী ৰকেট আৰু বিপুল পৰিমানৰ মাৰণাস্ত্ৰ উদ্ধাৰ কৰে। চীনত নিৰ্মিত প্ৰায় ৪০ মিটাৰ দীঘল এই ৰকেটসমূহে ১৫০০ কিলোমিটাৰ দূৰত্ব ভেদি টেংককে ধৰি যিকোনো বাহন ধ্বংস কৰিব পাৰে।
উল্লেখযোগ্য যে পূৰ্বেও এই বনাঞ্চলৰ পৰাই ৰেপিড একশ্যন বাহিনীয়ে ৰকেট লাঞ্চাৰ, মৰ্টাৰকে ধৰি অত্যাধুনিক মাৰণাস্ত্ৰ উদ্ধাৰ কৰিছিল।
