জনিয়া সমষ্টিত এআইয়ুডিএফৰ প্ৰাৰ্থী হাফিজ ৰফিকুল ইছলাম জয়ী হোৱাৰ পাছতেই তেওঁৰ দলৰে অন্য এগৰাকী বিধায়ক হাফিজ বছিৰ আহমেদে কংগ্ৰেছক ক্ষুৰধাৰ সমালোচনা কৰে।
‘’কংগ্ৰেছে ভ্ৰষ্টাচাৰিতা, দুৰ্নীতি আৰু বৈষম্যমূলক আচৰণ দেশ স্বাধীন হোৱাৰ পাছৰে পৰা কৰি আহিছে, সেই কথা বিলাক যোৱা লোকসভা নিৰ্বাচন আৰু বিধানসভা নিৰ্বাচনত স্পষ্ট হৈ পৰিল। ৰাইজে এতিয়া বুজি পাইছে। সেইকাৰণে এইবাৰ আশা কৰাতকৈ জনিয়াবাসী ৰাইজে বেছিকৈ ভোট দিছে।‘’
নৰ্থ ইষ্ট নাওৰ সাংবাদিকৰ আগত কংগ্ৰেছক সমালোচনা কৰি এইদৰে কয় বিধায়কজনে।
ইপিনে, বিজেপি আৰু এআইয়ুডিএফে জনিয়া সমষ্টিত গোপন বুজা-বুজিৰে হাফিজ ৰফিকুল ইছলামক জয়ী কৰোৱা বুলি অনা গুৰুতৰ অভিযোগৰ প্ৰতিক্ৰিয়া প্ৰকাশ কৰিবলৈ গৈ আহমেদৰ প্ৰশ্ন ‘কংগ্ৰেছে পুৰণা গান আৰু কিমান গাই থাকিব?’
আহমেদৰ মতে ‘আমাৰ কাৰো সৈতে বুজা-পৰা হোৱা নাই। আমি একলা চল’ নীতিৰে নিৰ্বাচনত প্ৰতিদ্বন্দিতা কৰিছো।‘
আনহাতে,বুধবাৰে এক সংবাদমেলযোগে বিৰোধী দলপতি দেবব্ৰত শইকীয়াই তৌফিকুৰ ৰহমানে এআইয়ুডিএফৰ কাৰ্য্যালয়ে কাৰ্য্যালয়ে গৈ ভোট বিচৰা বুলি উল্লেখ কৰি বিজেপি আৰু এআইয়ুডিএফৰ গোপন বুজা-বুজি হোৱা বুলি মন্তব্য কৰিছিল।
ইয়াৰ প্ৰত্যুত্তৰত এআইয়ুডিএফ বিধায়কগৰাকীয়ে কয়, ‘’তৌফিকুৰ ৰহমানে সৌহাৰ্দ্যমূলকভাৱে এআইয়ুডিএফৰ কাৰ্য্যালয়ত গৈছে। সভ্যতাৰ নিদৰ্শন হিচাপে তেওঁ গৈছিল, নিৰ্বাচনী প্ৰচাৰৰ লগত তাৰ কোনো সম্পৰ্ক নাই।‘’
ইপিনে, ‘উপ নিৰ্বাচনৰ ফলাফলেই ২১’ৰ নিৰ্বাচনৰ ফলাফল‘ বুলি মন্তব্য কৰি ‘অহা ২১’ৰ নিৰ্বাচনত আমাৰ আটাইতকৈ বেছি ভাল ফলাফল হ’ব‘ বুলিও আশা প্ৰকাশ কৰে বিধায়ক আহমেদে।
‘’শান্তি সম্প্ৰীতি অটুট ৰাখি যিসকলে ভোটদান কৰি আমাৰ প্ৰাৰ্থীগৰাকীক জয়ী কৰালে সেইসকলক ধন্যবাদ জ্ঞাপন কৰিছো,’’- আহমেদে এইদৰে কয়।
