বোকাখাতৰ ধনশিৰিমুখ পথৰ এটা পুলৰ তলৰ পানী যুঁৱলিৰ পৰা আজি এজন পুৰুষৰ মৃতদেহ উদ্ধাৰ কৰা হয়।
মৃত লোকজনক ডিফলু বাগিচাৰ চম্বাৰু ওৰফে ভটকো তাঁতী বুলি পৰিয়ালৰ সদস্যই চিনাক্ত কৰিছে। তেওঁৰ মৃত্যুৰ কাৰণ জানিব পৰা হোৱা নাই যদিও মৃতদেহৰ মূৰৰ সোঁ দিশে গভীৰ ক্ষত চিহ্ন পোৱা গৈছে।
পৰিয়ালৰ লোকে জনোৱা মতে চম্বাৰু তাঁতী পেচাত এজন বেণ্ড পাৰ্টীৰ বাজানা বাদক আছিল। শনিবাৰে বোকাখাতৰ এজন ব্যক্তিৰ ঘৰত সহযোগীৰ সৈতে বেণ্ড বজাবলৈ যোৱা চম্বাৰু ঘৰলৈ ওভটি অহা নাছিল।
প্ৰথমতে লগৰে কোনো সতীৰ্থৰ সৈতে থাকিব পাৰে বুলি পৰিয়ালৰ লোকে ভাবিছিল। কিন্তু আজি পুৱা স্থানীয় লোকে চম্বাৰুৰ মৃতদেহ পুলৰ কাষত পানীৰ যুঁৱলিত পৰি থকা অৱস্থাত প্ৰত্যক্ষ কৰি আৰক্ষীক খবৰ দিয়ে ৷
পিছত বোকাখাত আৰক্ষী ঘটনাস্থলীত উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
