মিলিন্দ সুমন আৰু অংকিতা কোঁৱৰে চলোৱা টাটা নেক্সন ইলেকট্ৰিক কাৰ’ৰ ভিডিঅ’ মুকলি

মানালিৰ পৰা লেহলৈ টাটা নেক্সন ইলেকট্ৰিক কাৰ চলোৱা এলানি ভিডিঅ’ ছিৰিজ য়ুটিউবত মুকলি হৈছে। হিমালয় অঞ্চলত এইদৰে চলোৱা এইখনেই হৈছে প্ৰথম ইলেকট্ৰিক কাৰ।

ভিচিঅ’টোত অসমৰ জোঁৱাই অভিনেতা মিলিন্দ সুমন আৰু পত্নী অংকিতা কোঁৱৰে গাড়ীখন চলাই যোৱা দেখা গৈছে।

এই ভিডিঅ’ ছিৰিজটোৰ দুটা খণ্ড ইতিমধ্যে মুকলি কৰা হৈছে।

গোটেই বিশ্বতে ইলেকট্ৰিক বাহনৰ উদ্যোগে দ্ৰুত প্ৰসাৰ লাভ কৰিছে। ভাৰতীয় বজাৰতো ইলেকট্ৰিক বাহনে গুৰুত্ব লাভ কৰিছে।

ভাৰতৰ সকলো অটোমোবাইল নিৰ্মাতাই বৰ্তমান ইলেকট্ৰিক বাহন নিৰ্মাণ কৰি উলিওৱাৰ দিশত মনোনিৱেশ কৰিছে।

বৰ্তমান টাটা মটৰ্ছে ইয়াৰ পৰৱৰ্তী ইলেকট্ৰিক বাহন নেক্সন বজাৰত মুকলি দিয়াৰ বাবে প্ৰায় সাজু হৈছে।

কিছুদিন পূৰ্বে টাটা নেক্সন ই ভি (Tata Nexon EV) পৰীক্ষামূলকভাৱে চলোৱা দেখা গৈছিল। ইয়াৰ কেই সপ্তাহ পাছতে টাটা মটৰ্ছে Ziptron নামৰ এক নতুন ইলেকট্ৰিক বাহনৰ প্ৰযুক্তিৰ কথা ঘোষণা কৰিছিল।

টাটা মটৰ্ছে ঘোষণা কৰিছিল যে নেক্সন ই ভি হ’ব Ziptron প্ৰযুক্তি ব্যৱহাৰ হোৱা প্ৰথমখন ইলেকট্ৰিক কাৰ।

এতিয়া নেক্সন ই ভিক এলানি ভিডিঅ’ ছিৰিজৰ জৰিয়তে ইয়াৰ সক্ষমতাসমূহ দাঙি ধৰা হৈছে।‘’ TheUltimateElectricDrive’’ শীৰ্ষক ভিডিঅ’ ছিৰিজটোত অভিনেতা মিলিন্দ সুমন আৰু পত্নী অংকিতা কোঁৱৰে মানালিৰ পৰা লেহলৈ টাটা নেক্সন ই ভি চলাই যোৱা দেখা গৈছে।

এটা ভিডিঅ’ত মিলিন্দ সুমনে কৈছে যে ই ৮৫ৰ পৰা ১০০ শতাংশ চাৰ্জ লওতে প্ৰায় দুঘন্টা সময় লয়।

টাটা নেক্সন ই ভি Ziptron প্ৰযুক্তিৰ অংশ হিচাপে এটা lithium-ion battery pack ৰ দ্বাৰা শক্তি আহৰণ কৰে। ইলেকট্ৰিক মটৰটোৱে ফ্ৰন্ট হুইলবোৰ চলাই নিয়ে।

বেটাৰী আৰু মটৰ দুয়োটাই IP67 মান সম্পন্ন আৰু সেইবাবেই ৱাটাৰপ্ৰুফ তথা ডাষ্টপ্ৰুফ। ৮ বছৰ ৱাৰেন্টি লৈ ই আহিছে।

এই কাৰখন প্ৰডাকশ্যনৰ বাবে সাজু হৈছে আৰু ২০২০ৰ ইণ্ডিয়ান অটো এক্সপ’ত মুকলি কৰাৰ আশা কৰা হৈছে।