অৰুণাচল প্ৰদেশৰ উপ মুখ্যমন্ত্ৰী চাওনা মেইয়ে কয় যে আগন্তুক বছৰবোৰত উত্তৰ-পূৰ্বাঞ্চললৈ বৃহৎ বিনিয়োগ বৃদ্ধি পাব আৰু এইটোৱে এই পাৰ্বত্য অঞ্চলটোত অভূতপূৰ্ব বিকাশ সাধিব।
সোমবাৰে ইটানগৰৰ ৰাজীৱ গান্ধী বিশ্ববিদ্যালয়ত অৰ্থনীতি বিভাগৰ চেন্টাৰ ফৰ ডেভেলপমেন্ট ষ্টাডিছে আয়োজন কৰা ‘পাহাৰীয়া অঞ্চলৰ অৰ্থনীতি আৰু স্থায়ী উন্নয়ন-প্ৰত্যাহ্বান ও সম্ভাৱনা’ শীৰ্ষক এখন ৰাষ্ট্ৰীয় আলোচনাচক্ৰত উপস্থিত থাকি তেওঁ এনেদৰে মত ব্যক্ত কৰে।
তেওঁ কয় যে উত্তৰ-পূৰ্বাঞ্চলৰ পাহাৰীয়া ৰাজ্যকেইখন প্রচুৰ প্ৰাকৃতিক সম্পদেৰে চহকী আৰু বিভিন্ন নদী, বন্যপ্ৰাণী, জৈৱ বৈচিত্ৰৰে পৰিপূৰ্ণ ইয়াক ‘জৈৱ-সম্পদৰ খনি’বুলি কোৱা হয়।
এই অঞ্চলত কৃষি-বনাঞ্চল, উদ্যান শস্য, খাৰিফ শস্য, জৈৱিক কৃষি, পশু পালন, পৰ্যটন, জলবিদ্যুৎ, খনি তথা খনন, কুটীৰ আৰু ক্ষুদ্ৰ উদ্যোগ আৰু বন ভিত্তিক উদ্যোগৰ দৰে ক্ষেত্ৰসমূহত বিকাশৰ প্ৰচুৰ সম্ভাৱনা আছে বুলি তেওঁ কয়।
মেইয়ে লগতে দোহাৰে যে এই সময়ত আটাইতকৈ প্ৰয়োজনীয় কথাটো হ’ল এই সম্পদসমূহক এটা আৰ্থিক চালিকা শক্তিলৈ পৰিৱৰ্তন কৰাৰ উপায় সন্ধান কৰা।
তেওঁ কয়, ‘’পাহাৰীয়া ৰাজ্যসমূহত থকা অসুবিধাসমূহ অতিক্ৰম কৰিবলৈ অঞ্চলটোৰ বাবে বিশেষভাৱে নীতি প্ৰস্তুত কৰাৰ প্ৰয়োজন যাতে ইয়াত উপলব্ধ সম্পদসমূহ লাভ আহৰণ কৰিব পাৰি।‘’
বিশ্ববিদ্যালয়খনৰ উপাচাৰ্য অধ্যাপক টামো মিবাঙে তেওঁৰ ভাষণত কয় যে যিকোনো অঞ্চলৰে বিকাশৰ বাবে প্ৰাথমিক চৰ্ত হৈছে শান্তি আৰু প্ৰত্যাশিত অৰ্থনৈতিক বিকাশৰ লক্ষ্যত উপনীত হ’বলৈ আন এক গুৰুত্বপূৰ্ণ দিশ হ’ল উন্নত যোগাযোগ ব্যৱস্থা।
জয়পুৰৰ জয়পুৰীয়া ইনষ্টিটিউট অফ মেনেজমেন্টৰ সঞ্চালক তথা ৰাজ্যখনৰ ৰাজীৱ গান্ধী বিশ্ববিদ্যালয়ৰ প্ৰতিষ্ঠাপক অধ্যাপক প্ৰভাত কুমাৰ পঙ্কজে কয় যে স্থায়ী বিকাশৰ বাবে গ্ৰহণ কৰা যিকোনো ব্যৱস্থাই জনসাধাৰণৰ সুখ-সমৃদ্ধি বৃদ্ধি কৰা উচিত।
বিশ্ববিদ্যালয়খনৰ অৰ্থনীতি বিভাগৰ মুৰব্বী অধ্যাপক এছ কে নায়ক আৰু সেই বিভাগৰে অধ্যাপকদ্বয় এন চি ৰয় আৰু এ মিত্ৰইয়ো আলোচনা চক্ৰত ভাষণ দিয়ে।
দেশৰ বিভিন্ন প্ৰান্তৰ পৰা অহা অধ্যাপক তথা বিশেষজ্ঞই আলোচনা চক্ৰখনত অংশগ্ৰহণ কৰে।
