২০১২ চনত ঘটা এটা ঘটনাই ম্যানমাৰৰ ৰেখাইন প্ৰদেশৰ মুছলমানসকলৰ জীৱনলৈ আন্ধাৰ নমাই অনাৰ পিছত তেওঁলোকৰ জীৱন সীমাবদ্ধভাৱে অতিবাহিত হৈছে ম্যানমাৰ চৰকাৰে নিৰ্দিষ্ট কৰি দিয়া শিবিৰ সদৃশ ঠাইত।
উক্ত ঘটনাটো আছিল এগৰাকী বৌদ্ধ সম্প্ৰদায়ৰ মহিলাক মুছলমান লোক কেইজনমানে ধৰ্ষণ কৰাৰ অভিযোগ।
তাৰ পিছতে সাম্প্ৰদায়িক সংঘৰ্ষৰ সূত্ৰপাত ঘটে। স্থানীয় আৰু সংখ্যাগৰিষ্ঠ বৌদ্ধ লোকৰ সন্মিলিত আক্ৰমণ চলে অঞ্চলটোৰ সংখ্যালঘু মুছলমান জনবসতিৰ এলেকাত।
প্ৰায় ২০০ মুছলমান সম্প্ৰদায়ৰ লোকক হত্যা কৰা হয়, শ শ ঘৰ ধ্বংস কৰা হয়। আৰক্ষীয়ে সুৰক্ষা দিয়াৰ নামত প্ৰায় সাক্ষী গোপাল হৈ থাকে।
এই ঘটনাৰ পিছত হাজাৰ হাজাৰ সংখ্যালঘু মুছলমান লোক গৃহহাৰা হৈ পৰে আৰু কোৱা হয়, ২০১৭ চনৰ ৰহিঙীয়াৰ ওপৰত চলা গণ নিৰ্য্যাতনৰ বীজ এই ঘটনাৰ জৰিয়তেই ৰোপণ কৰা হৈছিল।
এই ঘটনাই বৌদ্ধ আৰু সংখ্যালঘু মুছলমানৰ মাজৰ সম্পৰ্কৰ এনেকুৱা অৱনতি ঘটালে যে সি যে কেতিয়াবা এটা পাৰস্পৰিক আস্থাৰ পৰ্য্যায়লৈ ঘূৰি যাব তাত সন্দেহ আছে।
উক্ত ঘটনাটোৰ পিছত সংখ্যালঘু মুছলমানসকল এক প্ৰকাৰৰ চৰকাৰী বাহিনীৰ কঢ়া নজৰত থাকিব লগীয়া হৈছে। শ শ জুপুৰি সদৃশ ঘৰ আৰু চালিৰে ভৰা এটুকুৰা অস্বাস্থ্যকৰ অঞ্চলত তেওঁলোক চৰকাৰৰ নিৰন্তৰ নিৰীক্ষণৰ মাজত জীৱন অতিবাহিত কৰি আহিছে।
তেওঁলোকৰ চাল-চলন সীমাবদ্ধ কৰা হৈছে, বাহিৰৰ জগতৰ লগত সম্পৰ্ক সীমিত কৰা হৈছে। শিবিৰৰ পৰা নগৰলৈ যাবলৈ তেওঁলোকক দুঘণ্টাৰ বাবেহে অনুমতি দিয়া হয় আৰু সেয়াও সশস্ত্ৰ আৰক্ষীয়ে নিৰীক্ষণ কৰি থাকে। দুঘণ্টাৰ পিছত শিবিৰলৈ ঘূৰি অহাটো এটা নিয়ম।
তেওঁলোকৰ বাবে শিক্ষা, জীৱিকা আৰু স্বাস্থ্যসেৱা উদ্বেগজনকভাৱে সীমিত।
শিবিৰৰ এই যন্ত্ৰণাময় জীৱনত উত্যক্ত এজন ৰহিঙীয়াই কয় যে এই দুৰ্ভাগ্যজনক ঘটনাটোৰ পূৰ্বে তেওঁলোকৰ জীৱন স্বাভাৱিক আছিল।
তেওঁলোকৰ কোনোবা শিক্ষক আছিল, কোনোবা উকীল আনকি কোনোজন ন্যায়াধীশো আছিল। ব্যৱসায় কৰি, মাছমাৰি, মাছ বিক্ৰী কৰি, গৰুগাড়ীত বস্তু কঢ়িয়াই একোটা স্বতন্ত্ৰৰীয়া জীৱিকাৰে জীৱন যাৱন কৰিছিল বেছিভাগ লোকে। প্ৰতিৱেশী বৌদ্ধসকল তেওঁলোকৰ বন্ধু আছিল।
মানৱ অধিকাৰ বিষয়ক আন্তঃৰাষ্ট্ৰীয় সংগঠন এমনেষ্টি ইণ্টাৰনেশ্যনেলে ইয়াক “বিচ্ছিন্নতা আৰু বৈষম্যৰ অনুষ্ঠানিক পদ্ধতি” আখ্যা দিছে আৰু বৰ্ণ বৈষম্যৰ যুগৰ দক্ষিণ আফ্ৰিকাৰ কুখ্যাত “এপাৰ্থেইড” (apartheid) নিয়মৰ সৈতে তুলনা কৰিছে।
এই শিবিৰবোৰৰ আৱাসীসকলে স্বাধীনতাহীন আৰু যন্ত্ৰণাময় জীৱনৰ পৰা উদ্ধাৰ পোৱাৰ আশাৰে সঘনাই পলায়নৰ চেষ্টা কৰে। তেওঁলোকে সাধাৰণতে জলপথেৰে বিভিন্ন মানৱ সৰবৰাহকাৰীৰ সহায়ত পলায় আৰু থাইলেণ্ড আৰু মালয়েছিয়াক লক্ষ্যস্থল কৰি লয়।
যোৱা ২২ নৱেম্বৰত নাৱেৰে পলাব খোজা ২২জন ৰহিঙীয়া মুছলমান লোকক ম্যানমাৰ আৰক্ষীয়ে গ্ৰেপ্তাৰ কৰিছে। ৯জন পুৰুষ আৰু ১৩গৰাকী মহিলা।
তেওঁলোকে আৰক্ষীক দিয়া ভাষ্য অনুসৰি তেওঁলোকে ৰেখাইন প্ৰদেশৰ এটা শিবিৰৰ পৰা পলাইছিল আৰু ভ্ৰমণ কৰা নাওখনত ফুটা হোৱা বাবে পাৰলৈ উঠিব লগীয়া হয়।
ইয়াৰ পূৰ্বে ছেপ্টেম্বৰ মাহতো ৩০জন ৰহিঙীয়াক পলাব খোজোতে নাৱৰ পৰা গ্ৰেপ্তাৰ কৰা হৈছিল। তেওঁলোকো ৰেখাইন প্ৰদেশৰে আছিল।
