মাত্ৰ ১২ বছৰ বয়সতে “মেট্ৰিক”ত অৱতীৰ্ণ হৈ অভিলেখ গঢ়িবলৈ আগবাঢ়িছে মণিপুৰী ছাত্ৰ

মণিপুৰৰ এগৰাকী ১২ বছৰীয়া ছাত্ৰই গঢ়া এটা অভিলেখে এতিয়া সৰ্বত্ৰে চৰ্চা লাভ কৰিছে। যিহেতু ছাত্ৰ গৰাকীয়ে ১২ বছৰ বয়সতে অৱতীৰ্ণ হ’ব ২০২০ৰ ফেব্ৰুৱাৰিত হ’বলগীয়া হাইস্কুল শিক্ষান্ত পৰীক্ষাত।

মণিপুৰৰ চৌৰাচান্দপুৰ জিলাৰ কাংগাই গাঁৱৰ ১২ বছৰীয়া ইছাক পাওলাল্লুংমুৱান ভাইফে (Issac Paulallungmuan Vaiphei) নামৰ ছাত্ৰ গৰাকীয়ে এই অভিলেখৰ বাবে সমগ্ৰ দেশৰ শৈক্ষিক মহলৰ দৃষ্টি আকৰ্ষণ কৰিবলৈ সক্ষম হৈছে।

গেনখ’লিয়েন ভাইফে আৰু নেংমাগাইজিল ভাইফেৰ ৬ টা সন্তানৰ ভিতৰত ১২ বছৰীয়া ইছাক পাওলাল্লুংমুৱান ভাইফে (Issac Paulallungmuan Vaiphei) হ’ল ডাঙৰ সন্তান।

মণিপুৰৰ স্থানীয় ব’ৰ্ড অৱ চেকেণ্ডাৰী এডুকেশ্বনে এই ঘটনাক এক বিশেষ ঘটনা হিচাপে অভিহিত কৰি ১২ বছৰ বয়সতে ছাত্ৰগৰাকীক হাইস্কুল শিক্ষান্ত পৰীক্ষাত বহাৰ অনুমতি প্ৰদান কৰিছে। ফলত ছাত্ৰ গৰাকীয়ে মণিপুৰৰ সবাতোকৈ কনিষ্ঠ ছাত্ৰৰ স্বীকৃতি লাভ কৰিছে।

ইছাকৰ পিতৃ গেনখ’লিয়েনে ছাত্ৰগৰাকীক মেট্ৰিক পৰীক্ষাত বহাৰ অনুমতি বিচাৰি শিক্ষা বিভাগলৈ আবেদন কৰিছিল। ইয়াৰ পিছতে শিক্ষা বিভাগে ছাত্ৰগৰাকীৰ মনস্তাত্ত্বিক পৰীক্ষা কৰাৰ নিৰ্দেশ দিয়ে।

ফলত ইম্ফলৰ ৰিম্স ক্লিনিকত ছাত্ৰ গৰাকীৰ মনস্তাত্ত্বিক পৰীক্ষা কৰাত ছাত্ৰজনৰ ১২ বছৰ বয়সতে মগজুৰ বিকাশ ১৭ বছৰ ৫ মাহৰ হোৱা বুলি জনা যায়। লগতে ১২ বছৰীয়া ছাত্ৰ জনৰ আই কিই ১৪১ পোৱা গৈছিল।

ইয়াৰ পিছতে ব’ৰ্ড ছাত্ৰগৰাকীক হাইস্কুল শিক্ষান্ত পৰীক্ষাত বহাৰ অনুমতি দিয়ে। ইফালে এই কথা ইছাকে সাংবাদিকৰ আগত কয় যে, “ব’ৰ্ডে মোক হাইস্কুল শিক্ষান্ত পৰীক্ষাত বহিবৰ বাবে অনুমতি দিয়াত মই অত্যন্ত সুখী হৈছো। এইটো মোৰ সপোন আছিল।”

লগতে ছাত্ৰ গৰাকীয়ে কয় যে, “মই দেশ আৰু মণিপুৰৰ মানুহৰ সেৱা কৰিব বিচাৰো।”

উল্লেখযোগ্য যে ১২ বছৰ বয়সতে হাইস্কুল শিক্ষান্ত পৰীক্ষাত অৱৰ্তীণ হোৱা ইছাক পাওলাল্লুংমুৱান ভাইফে (Issac Paulallungmuan Vaiphei) উত্তৰ-পূবৰ সবাতোকৈ কনিষ্ঠ শিক্ষাৰ্থী।