শেহতীয়াভাৱে কেইবাখনো অসমীয়া চিনামেই বাণিজ্যিকভাৱে সফল হোৱাৰ পিছত এইবাৰ ৬ ডিচেম্বৰত মুক্তি লাভ কৰিবলৈ সাজু হৈছে আন এখন অসমীয়া ছবি প্ৰতিঘাত।
দৰ্শকক আকৰ্ষিত কৰাৰ উদ্দেশ্যে বৰ্তমান টিম প্ৰতিঘাতে ৰাজ্যৰ বিভিন্ন স্কুল আৰু কলেজত চিনেমাখনৰ প্ৰচাৰ চলোৱাত ব্যস্ত আছে।
ঠিক সেইদৰে মঙলবাৰে ছবিখনৰ প্ৰচাৰৰ উদ্দেশ্যে মুখ্য চৰিত্ৰত অভিনয় কৰা দিগন্ত হাজৰিকা, অম্ৰিতা গগৈ শিশু শিল্পী আশ্ৰমিকা শইকীয়াৰ লগতে কেইবাগৰাকীও শিল্পীয়ে ওদালগুৰি জিলাৰ টংলা চহৰস্থিত নেশ্যনেল পায়নিয়াৰ জুনিয়ৰ কলেজত উপস্থিত হয়।
প্ৰতিঘাতৰ দলটোৱে বিদ্যালয়খনৰ ছাত্ৰ-ছাত্ৰী, শিক্ষকৰ লগতে বিভিন্ন জনক সাক্ষাৎ কৰি সকলোকে ছবিখন চাবলৈ অনুৰোধ জনায়।
ছবিখনৰ মূল চৰিত্ৰত অভিনয় কৰা অভিনেত্ৰী অম্ৰিতা গগৈয়ে কয়, ‘আমি অত্যন্ত আশাবাদী যে দৰ্শকসকলে ছবিখনক মৰম আৰু আশীৰ্বাদ দিব’।
প্ৰচাৰৰ সময়ত অভিনেত্ৰীগৰাকীয়ে ছবিখনৰ কেইটামান জনপ্ৰিয় সংলাপেৰে উপস্থিত দৰ্শকক আমোদ দিয়ে।
নাৰী সৱলীকৰণৰ ওপৰত নিৰ্মাণ কৰা এই ছবিখনে দৰ্শকৰ পৰা বিপুল সঁহাৰি লাভ কৰিব বুলি আশা প্ৰকাশ কৰিছে অভিনেতা দিগন্ত হাজৰিকাই।
ইফালে ছবিখনত গীত পৰিৱেশন কৰা জুবিন গাৰ্গে সকলো ৰাইজকে প্ৰতিঘাত চাবলৈ আহ্বান জনাইছে।
