সোমবাৰে অৰ্থাৎ অহা ৯ ডিচেম্বৰৰ দিনা জাতিধ্বংসী নাগৰিকত্ব সংশোধনী বিধেয়কৰ বিৰুদ্ধে প্ৰতিবাদ হিচাপে ১২ ঘন্টীয়া অসম বন্ধ আহ্বান জনাইছে সদৌ অসম চুতীয়া ছাত্ৰ সন্থাই।
নৰ্থ ইষ্ট নাওৰ সৈতে হোৱা টেলিফোনিক বাৰ্তালাপত এই কথা জনায় সংগঠনটোৰ ৰাজ্যিক সাধাৰণ সম্পাদক মহেন বৰাই।
সোমবাৰে পুৱা ৫ বজাৰ পৰা সন্ধিয়া ৫ বজালৈ এই বন্ধ কাৰ্যসূচীৰ আহ্বান জনাইছে ছাত্ৰ সংগঠনটোৱে।
নাগৰিকত্ব সংশোধনী বিধেয়ক গৃহীত কৰিবলৈ কেন্দ্ৰীয় চৰকাৰে পূৰ্বৰ পৰা পৰিকল্পনা কৰিছিল বুলি অভিযোগ তোলে সংগঠনটোৰ সাধাৰণ সম্পাদক গৰাকীয়ে।
“আলোচনালৈ আমাক মাতিলে আমি কেবৰ বিৰুদ্ধে আমাৰ মন্তব্য অমিত শ্বাহৰ আগত ৰাখিলো। তাৰ পিছতে ৪ ডিচেম্বৰত কেবৰ অনুমোদন জনালে, এয়া বিজেপি চৰকাৰৰ পূৰ্বৰ পৰিকল্পনা আছিল। তেওঁলোকে ষড়যন্ত্ৰ কৰি বিলখন পাছ কৰিব বিচাৰিছে। গতিকে জাতীয় স্বাৰ্থত বিধেয়ক বাতিলৰ দাবীত এই বন্ধৰ আহ্বান জনাইছো।” মহেন বৰাই এইদৰে কয়।
উল্লেখযোগ্য যে, নাগৰিকত্ব সংশোধনী বিধেয়কৰ বিৰুদ্ধে অসমত অগ্নিগৰ্ভা পৰিস্থিতি হোৱাৰ পাছতো বিল গৃহীত কৰাৰ বাবে বদ্ধ পৰিকৰ বিজেপি চৰকাৰ।
