আছুৰ কেন্দ্ৰীয় সমিতিৰ এগৰাকী নেতাই সোমবাৰে কয়,’’ নাগৰিকত্ব সংশোধনী আইন বলপূৰ্বকভাৱে জাপি দিবলৈ অসমৰ বিজেপি নেতাসকল অসমীয়া লোকৰ অভিভাৱক নহয়।‘’
ওদালগুৰি জিলাৰ টংলাত কা বিৰোধী প্ৰতিবাদত যোগদান কৰি আছুৰ সহকাৰী সাধাৰণ সম্পাদক জয়ন্ত কুমাৰ ভট্টাচাৰ্যই কয়,’’ খিলঞ্জীয়া লোকসকলৰ ক্ষতি কৰিব পৰা এখন আইন বলপূৰ্বক জাপি দিবলৈ অসমৰ বিজেপি নেতাসকল অসমৰ ৰাইজৰ অভিভাৱক নহয়।‘’
আছুৰ টংলা শাখাই আয়োজন কৰা প্ৰতিবাদী ধৰ্ণা কাৰ্যসূচীত বৃহৎ সংখ্যাক জ্যেষ্ঠ নাগৰিক, শিক্ষাবিদ, শিল্পী আৰু ছাত্ৰ নেতাই অংশ গ্ৰহণ কৰে।
হাতে হাতে প্লেকাৰ্ড লৈ প্ৰতিবাদকাৰীসকলে “আমি কা নিবিচাৰো’, “তেজ দিম কিন্তু কা গ্ৰহণ নকৰো’, “ইনক্লাৱ জিন্দাবাদ’,”জয় আই অসম’ আদি শ্ল’গান দিয়ে।
প্ৰতিবাদকাৰীসকলে চৰকাৰৰ বিৰুদ্ধে শ্ল’গান দিয়াৰ লগতে নতুন আইনখন বাতিল কৰাৰ দাবী তোলে।
বিশিষ্ট অসমীয়া গল্পকাৰ জয়ন্ত চক্ৰৱৰ্তীয়ে প্ৰতিবাদ অংশগ্ৰহণ কৰি কয়, ‘’অসমে ইতিমধ্যে ১৯৫১ৰ ঠাইত ১৯৭১ চন মানি লৈ অবৈধ অনুপ্ৰৱেশকাৰীৰ বোজা গ্ৰহণ কৰিছে আৰু অসম চুক্তিক অৱমাননা কৰা এখন ৰাইজে কেতিয়াও গ্ৰহণ নকৰে।‘’
তেওঁ লগতে কয়,’’ আৰ এছ এছ আৰু বিজেপিৰ হিন্দুত্বৰ এজেণ্ডা ৰূপায়ন কৰা আৰু তেওঁলোকৰ ভোটবেংকৰ ৰাজনীতি সুৰক্ষিত কৰাৰ স্বাৰ্থতে অসাংবিধানিক আৰু অ-ধৰ্মনিৰপেক্ষ আইনখন অনা হৈছে।‘’
চক্ৰৱৰ্তীয়ে লগতে আঙুলিয়াই দিয়ে যে ৰাজনীতিলৈ যোৱা ছাত্ৰ নেতাসকলে “অসমৰ ভাষা-সংস্কৃতিৰ প্ৰতি ভাবুকি’ এই আইনখনক সমৰ্থন কৰি ৰাইজক “বিশ্বাসঘাতকতা’ কৰিছে।
তেওঁ লগতে কয়,’’ সহজ-সৰল, শান্তিপ্ৰিয় তথা সম্প্ৰীতিৰে বাস কৰা অসমীয়াসকলক চৰকাৰে অস্থিৰতাৰ মাজলৈ ঠেলি দিছে।‘’
এগৰাকী জ্যেষ্ঠ নাগৰিক দীপক তালুকদাৰে কয়,’’ আমি জনসাধাৰণৰ অধিকাৰ সুৰক্ষিত কৰাৰ বাবে সকলো চেষ্টা কৰিম আৰু ভৱিষ্যৎ প্ৰজন্মৰ বাবে এখন সুস্থ সমাজ আগবঢ়াই যোৱাৰ বাবে আমাৰ শেষ নিশ্বাস থকালৈকে নতুন আইনখনৰ বিৰুদ্ধে যুঁজ দি যাম।‘’
অভিনেতা দেবজিৎ মজুমদাৰ আৰু শৰ্মিষ্ঠা চক্ৰৱৰ্তীয়েও প্ৰতিবাদত অংশগ্ৰহণ কৰে।
আছুৰ টংলা শাখাৰ সভাপতি প্ৰাঞ্জল ডেকাই কয়,’’অসমীয়া ইতিমধ্যে অসমৰ ৰাজ্যভাষা কিন্তু ৰাজ্য চৰকাৰে ইতিমধ্যে থকা আইনখনৰ কথাকে দোহাৰি এক ভেঙুচালি কৰিছে।‘’
