কা-বিৰোধী আন্দোলনকাৰীৰ ঘৰ জ্বলাবলৈ বিজেপি কৰ্মীক উচটনি দিয়া খুমটাই সমষ্টিৰ বিজেপি বিধায়ক মৃণাল শইকীয়াৰ মন্তব্যক লৈ সৰ্বত্ৰে চৰ্চা হৈছে।
পূৰ্বেও বিতৰ্কিত আৰু সাম্প্ৰদায়িক মন্তব্য কৰাৰ উদাহৰণ থকা বিধায়কজনে ডিব্ৰুগড়ৰ চাবুৱাত এখন বিজেপি কৰ্মীসভাত কৈছিল, “ইমান দিনে যি সহ্য কৰিলে কৰিলে, এতিয়া আপোনালোকৰ ঘৰ জ্বলালে আপোনালোকেও জ্বলাব, আপোনালকৰ এজনক মাৰিলে সিহঁতৰ ১০জনক মাৰিব”।
গণতান্ত্ৰিক দেশ এখনৰ জনপ্ৰতিনিধি এজনৰ পৰা এনেকুৱা উচটনি অহাত ছ’চিয়েল মিডিয়া য়ুজাৰেকে ধৰি বিভিন্নজন সমালোচনাত সৰৱ হৈ পৰিছে।
নিজৰ দলৰ চৰকাৰ থকা সত্ত্বেও আন্দোলনৰ সময়ছোৱাৰ ঘটনাৱলীৰ বাবে আৰক্ষী প্ৰশাসনক জগৰীয়া কৰে।
আনহাতে আন্দোলনকাৰীক ইতিকিং কৰাও দেখা যায় বিধায়কজনক। তেওঁৰ মতে, মিডিয়াও জগৰীয়া। ৰাস্তাত কোনোবাই টায়াৰ জ্বলালেই অসম জ্বলিছে বুলি মন্তব্য কৰে মিডিয়াই।
চৰকাৰে বাৰে বাৰে কাকো উচটনিমূলক মন্তব্য নিদিবলৈ সকীয়াই অহাৰ সময়ত চৰকাৰৰ এজন বিধায়কৰ এই মন্তব্যৰ বিৰুদ্ধে কিয় ব্যৱস্থা লোৱা হোৱা নাই বুলি ছ’চিয়েল মিডিয়া য়ুজাৰে প্ৰশ্ন তুলিছে।
উল্লেখযোগ্য যে CAA-বিৰোধী আন্দোলন তীব্ৰতৰ হোৱাৰ আগে আগে মন্ত্ৰী হিমন্ত বিশ্বই “ক’ত আন্দোলন হৈছে, আশা কৰা মতে আন্দোলন হোৱাই নাই” বুলি মন্তব্য কৰাৰ উপৰি, বিধানসভাৰ মজিয়াতে “জয় বাংলা” ধ্বনি দিছিল যদিও চৰকাৰে এইবোৰতো কোনো ব্যৱস্থা লোৱা নাই। তাৰ বিপৰীতে ছ’চিয়েল মিডিয়াত মন্তব্য কৰা বহুকেইজনক ইতিমধ্যে আটক কৰা হৈছে।
